Dy projektligje të qeverisë që janë kundërshtuar zëshëm nga opozita dhe organizatat civile pritet të miratohen në Kuvend nga socialistët këtë të enjte.
Marrëveshja Rama-Meloni për refugjatët dhe projektligji që parashikon lejimin e ndërtimeve në zonat e mbrojtura janë parë si dy nisma me pasoja të pakthyeshme për mjedisin dhe në shkelje të drejtave të njeriut. Kritikat kanë ardhur jo vetëm nga aktorët brenda vendit, por edhe ata ndërkombëtarë. Pavarësisht kësaj, qeveria është shprehur e vendosur për ti çuar deri në fund.
Protokolli për marrëveshjen me palën italiane për refugjatët është ankimuar në Gjykatën Kushtetuese nga opozita, megjithatë gjyqtarët kushtetues vendosën në një vendim me shumicë, në favor të qeverisë. Edhe nisma tjetër pritet të ankimohet në Kushtetuese, megjithatë nisur nga vendimet e fundit të gjykatës që kanë shkuar në favor të qeverisë, të pakta janë shpresat se Kushtetuesja do të ndryshojë qasje.
Një tjetër pikë e rendit të ditës në Kuvend është amnistia penale, që kërkon shumicë të theksuar për tu miratuar. Duke qenë se nuk ka marrë dakordësinë e opozitës dhe as të grupit Basha, PS ka depozituar në Kuvend kërkesën për tërheqjen e nismës nga seanca e sotme.
Edhe seanca e sotme pritet të shoqërohet me tensione, me deputetët e opozitës që kanë paralajmëruar vijimin e aksionit për ndalimin e zhvillimit normale të punimeve të Kuvendit.
