Mbështetësit demokratë janë mbledhur sërish pasditen e sotme në protestë poshtë banesës së ish-kryeministrit Sali Berisha.
I pranishëm në tubim është edhe nënkryetari i Partisë Demokratike, Oerd Bylykbashi, i cili ka marrë fjalën para mbështetësve,
Bylykbashi ka komentuar deklaratat e sekretarit të Shtetit, Antony Blinken, i cili tha se kishte parë sot një Tiranë me ngjyra.
Bylykbashi u shpreh ndër të tjera se në Tiranë ai shikon vetëm dy ngjyra, ngjyrën e korrupsionit dhe parave të krimit të organizuar.
Pjesë nga fjala e Oerd Bylykbashit:
Mirëmbrëma demokratë, mirëmbrëma qëndrestarë.
Është dita e 48-të që jemi këtu bashkë.
Ditën e parë ishin 50- 60 të parët, të cilët nuk pritën dhe reaguan dhe erdhën këtu dhe që atë ditë nuk kemi reshtur përditë të vijmë këtu.
Kjo protesta jonë këtu e përditshme është ai pishtari që e mbajti të ndezur zjarrin dhe me datë 20 shkurt do jetë shumë herë më i madh.
Ishte pikërisht kjo rezistencë këtu që na dha mundësinë për këtë.
Ju falënderoj nga zemra për të gjithë këtë rezistencë.
Jam i sigurt se shumë demokratë të tjerë duan të jenë këtu, por janë me zemër.
Ka edhe të tjerë që janë në mëdyshje.
20 shkurti do u japë motivin e madh që të vazhdojmë përpara.
Sot unë dëgjova që Tirana qenka qytet me ngjyra. Unë di dy ngjyra, ngjyrën e korrupsionit dhe parave të krimit të organizuar.
Kjo është Tirana dhe gjithë Shqipëria.
Kjo është ngjyra që Edi Rama sa ka ardhur në pushtet, si ministër Kulture, si kryetar bashkie dhe si kryeministër në këto 11 vite, ka lyer fillimisht Tiranën dhe më pas Shqipërinë me këto dy ngjyra.
Të gjithë këto kulla të larta janë piramidat e krimit të organizuar dhe korrupsionit. Dhe kjo ka një arsye të vetme. Quhet pandëshkueshmëri.
Pandëshkueshmëri se është i sigurt që as SPAK-u dhe as sistemi gjoja i ri i drejtësisë nuk kanë për t’i bërë gjë.
Sepse ai arriti të bënte diçka që askush nuk ek kishte menduar. Korruptoi McGonigal, zyrtarin më të lartë të FBI, që e kishte për detyrë të luftonte korrupsionin. Dhe ai nesër dënohet si i korruptuar nga Edi Rama.
Ky është dënimi që do marrë dhe këtë ka bërë Edi Rama. Ky që e ka lyer këtë qytet me këto ngjyra që thashë, me paratë e krimit dhe korrupsionit.
McGonigal është çelësi me të cilin ai mendoi se do shkatërronte opozitën shqiptare.
Për fat të keq kjo histori nis në vitin 2017. Të gjithë e dini se çfarë ka bërë, se si ka qëndruar me Edi Ramën, ministrat dhe kryebashkiakët e tij.
Nesër merr vendimin në gjykatë McGonigal, por ajo që presim ne të gjithë është që Edi Rama të përgjigjet jo vetëm për këtë korrupsion, por për të gjithë atë që ka bërë në Shqipëri.
Tani po më pyesin se çfarë do bëhet? Një gjë e garantoj Edi Ramën, të gjitha ato që ka bërë ai dhe gjithë shpura e tij, do dënohen një për një për të gjitha ato që ka bërë.
Këto vepra penale që ka bërë Edi Rama, duan 20 vite që të pushohen veprat penale.
Po shumë më herët se kaq ai do japë llogari një për një për të gjitha dhe ky është zotimi solemn i imi.
20 shkurti është fillimi për ta çuar përpara drejtësisë.
Kurajo miq, të punojmë fort për 20 shkurtin dhe përtej 20 shkurtit të vazhdojmë përpara për ta shporrur këtë njeri që e leu Tiranën dhe Shqipërinë me ngjyrat e krimit dhe korrupsionit.
