Partia Demokratike denoncoi këtë të shtunë se përgjatë viteve të fundit, Top Channel ka marrë rreth 700 milionë lekë financime nga Bashkia Tiranës e drejtuar nga Erion Veliaj, gjatë viteve të fundit.
Sipas PD-së, në këmbim, Veliaj ka siguruar mbështetje redaksionale nga televizioni kombëtar dhe kanalet e tjera televizive apo radiofonike satelitë të Top Channel.
Për të njëjtin qëllim, denoncoi Partia Demokratike, i është dhënë mbi 200 milionë euro edhe një qendre, sipas saj të lidhur me Karlo Bolinon.
Faturat
Teksa publikoi faturat nga Drejtoria e Përgjithshme e Thesarit, nën varësi të Ministrisë së Financave, zëdhënësja për Anti-Korrupsionin në PD, Genta Vangjeli, denoncoi nga selia blu Erion Veliaj bleu mediat me paratë e inceneratorëve që ia’u zhvati taksapaguesve.
“Fondacionit Mediatik Dritan Hoxha, një degë e Top Channel, i ka dhënë një shumë prej 56 milion lekësh të rinj nëpërmjet pagesave, të ashtuquajtura projekte kulturore, gjithsej shtatë të tillë, nga viti 2016 deri në 2023”, tha Vangjeli.
“Top Albania Radios, një tjetër degë e Top Media, një fond prej 8.7 milion lekësh, të ndara në tre projekte kulturore ,në vitet 2021, 2022 dhe 2023“, shtoi.
“Top News, po ashtu satelit i Top Medias, një projekt kulturor të quajtur ‘Ora e Tiranës’ në vlerën e 5 milion lekëve të rinj në vitin 2023”, tha ajo.
Zëdhënësja për Anti-Korrupsionin në PD shtoi se “Qendrës URA, e përfshirë në kallzimin penal të depozituar nga deputetët e PD për Bunkart 1 dhe 2, I ka dhënë 22.2 milion lekë. Edhe në këtë rast fondet nga incineratorët janë maskuar nën zërin ‘projekte kulturore’, të tilla si ‘maratona e jetës’, ‘bunk jazz’, ‘magic show art’, e të tjera”.
“Kështu, Erion Veliaj, pronari faktik i incineratorit të Tiranës, sipas ish nr. 2 të qeverisë Rama, Arben Ahmetaj, ka paguar në total 92,7 milion lek të rinj që mediat dhe “VIP-at”, ti bëjnë fresk, t’i ndreqin imazhin dhe të mbyllin ekranet e mediave. Më kryesorja, Veliaj ka blerë heshtjen e medias ndaj megaskandalit të incineratorit inekzistent të Tiranës. Dhe kjo ka funksionuar mire, sikurse e pamë në rastin e gazetarit lobist dhe këshilltar, Baton Haxhiu, kur kërcnoi publikisht denoncuesin kryesor të inceneratorit të Tiranës, dhe rivalin e Erion Veliajt në zgjedhjet e 14 majit, Belind Këlliçi”, deklaroi Genta Vangjeli.
“SPAK nuk heton Veliajn dhe Ramën”
Ajo hodhi akuza ndaj Prokurorisë së Posaçme se ka marrë në mbrojtje kryebashkiakun e Tiranës Erion Veliaj dhe shefin e tij politik, kryeministrin Edi Rama dhe i bëri apel të hetojë blerjen e medias.
“Këto janë provat që paraqesim para publikut, sepse e dimë se SPAK nuk i mer parasysh faket që kanë të bëjnë me Ramën dhe Veliajn. Është i njëjti SPAK që deklaronte se nuk i di kush janë pronarët e incineratorëve dhe tashmë që i tregoi Arben Ahmetaj, prapë bën sikur nuk e di apo nuk ka dëgjuar gjë. SPAK, po të ishte në krye të detyrës, duhet të reagonte dhe të hetonte shpenzimet e kryera nga Bashkia Tiranë drejtpërdrejt në favor të mediave, të hetojë përfituesit e tërthortë mediatik të cilët janë paguar nga fondet e kësaj bashkie jo në mënyrë të drejtëpërdrejt”, përfundoi Vangjeli.
