Julian Meçaj, ish-anëtar i bandës së Durrësit, është arrestuar nga policia në Dubai. Meçaj ishte shpallur në kërkim për atentatin e ndodhur në 1 Nëntor të 2019 tek mbikalimi i Shkozetit.
Policia njoftoi këtë të enjte se ndalimi u bë me qëllim ekstradimi drejt Shqipërisë, ku Meçaj akuzohet për disa vepra penale.
“Ky shtetas ishte shpallur në kërkim ndërkombëtar nga Interpol Tirana pasi Gjykata e Posaçme kundër Korrupsionit dhe Krimit të Organizuar i ka caktuar masën e sigurisë ‘Arrest në burg’, për veprat penale ‘Vrasja e funksionarëve publike’ mbetur në tentativë, ‘Vrasja’, ‘Prodhimi dhe mbajtja pa leje e armëve dhe municionit luftarak’, ‘Vjedhja’ kryer në bashkëpunim, më shumë se një herë, ‘Grupi i strukturuar kriminal’ dhe ‘Sigurimi i kushteve/mjeteve për të kryer vrasje'”, njoftoi policia.
Akuzat lidhen me atentatin e 1 Nëntorit 2019. Në atë ngjarje mbetën të plagosur ish-prokurori Arjan Ndoja e Aleksandër Laho dhe humbi jetën shoferi i Ndojës, Andi Maloku.
Disa persona janë arrestuar lidhur me ngjarjen, ndërsa Plarent Dervishaj, i cili dyshohet të jetë kreu i grupit kriminal që kreu atentatin, është ende në kërkim.
Julian Meçaj, bashkë me Plarent Dervishajn, i kanë shpëtuar një atentati të ndodhur mesditën e 20 Qershorit 2019 në Durrës, kur dy persona të maskuar dhe të paidentifikuar qëlluan me armë zjarri drejt mjetit ku udhëtonin Meçaj, Dervishaj dhe një tjetër person.
