Policia e Shtetit ka bërë me dije arrestimin e një 32-vjeçari, i cili ishte shpallur në kërkim ndërkombëtar nga Maqedonia e Veriut.
Në kuadër të operacionit policor të koduar “Exit” është vënë në pranga shtetasi Valmir Etemi, lindur dhe banues në Strugë. Ai është kapur në tentativë për të dalë nga Republika e Shqipërisë.
“Ky shtetas ishte shpallur në kërkim ndërkombëtar nga Interpol Shkupi, pasi Zyra e Prokurorit Publik për Krimin e Organizuar dhe Korrupsionin në Maqedoninë e Veriut, me vendimin e datës 20 dhjetor të vitit të kaluar, ka lëshuar urdhër arresti ndërkombëtar për këtë shtetas, për veprën penale “Prodhimi dhe shitja e lëndëve narkotike”, parashikuar nga Kodi Penal i Maqedonisë së Veriut.
Ky shtetas akuzohet se gjatë vitit 2023, ka qenë njëri nga organizatorët e një grupi kriminal në Strugë, me aktivitet prodhimin dhe shitjen e lëndëve narkotike, kryesisht kokainë dhe kanabis. Lënda narkotike blihej nga bashkëpunëtorët e shtetasit Valmir Etemi dhe më pas shitej në Strugë, kryesisht në vende të përcaktuara.” – thuhet në njoftimin e Policisë.
Interpol Tirana vijon procedurat për ekstradimin e Valmir Etemit në Maqedoninë e Veriut.
