Më pak se 12 minuta zgjati seanca plenare e kësaj të enjteje, me deputetët e opozitës që vijuan protestën në Kuvend.
Ligjvënës së PD-së u vendosën që në nisje të seancës në hapësirën rreth foltores së Kuvendit, ndërsa në duar mbanin pankarta me mbishkrime si “vrarës i pluralizmit”, “Rama-izëm”, “vrasës i demokracisë”, etj. Ndërsa të tjerë frynin bilbila për të pamundësuar zhvillimin e një seance normale.
Ndryshe nga herët e fundit, kryeparlamentarja pranoi kërkesën e opozitës për të larguar nga salla punonjësit e gardës dhe u kërkoi deputetëve të ulen në vendet përkatëse. Megjithatë, ligjvënësit demokratë vijuan të mbanin në duar pankartat dhe nuk e ndalën zhurmën e bilbilit.
Këtu, Nikolla u kthye në skemën e vjetër. Trembëdhjetë projektligjet, aktet normative dhe projektvendimet në rendin e ditës u kaluan menjëherë në votim, duke anashkaluar diskutimet. Ato të qeverisë e mazhorancës u miratuan me votat e socialistëve, të cilët rrëzuan një projektligj nga deputetët e PL-së “Për indeksimin e pagës së punonjësve dhe nëpunësve në Republikën e Shqipërisë”. Pas votimit, Nikolla njoftoi mbylljen e seancës plenare.
Në një prononcim për mediat, deputeti demokrat Ervin Salianji kujtoi kërkesa e opozitës për përfaqësim në komisionin për reformën zgjedhore dhe bllokimin nga mazhoranca e komisioneve hetimore.
“Ne po kërkojmë dhe po i përsëris, tri kërkesa kushtetuese që nuk na i garanton Edi Rama, nuk na i garanton Lindita Nikolla dhe asnjë prej përfaqësuesve të PS-së. Po kërkojmë bashkëkryetarin e Komisionit të Reformës Zgjedhore. Ashtu siç e keni parë, 47 deputetë që përbëjnë shumicën e deputetëve të grupeve parlamentare të opozitës, kërkojnë që të kenë përfaqësimin e tyre në Komisionin e Reformës Zgjedhore dhe proporcionaliteti ndërkohë është i mirëpritur. Nuk mund të ketë një grupim që nuk është as parti me shtatë deputetë, të ketë katër përfaqësues dhe grupet opozitare, të gjithë partitë opozitare bashkë me partinë më të madhe që është PD dhe Grupi Parlamentar i PD, të mos kenë përfaqësimin e bashkëkryetarit”, deklaroi Salianji.
“Qëllimi i opozitës është të mos ketë jetë parlamentare normale për ti treguar qytetarëve që interesat e tyre nuk po përfaqësohen”, tha deputeti.
Një qëndrim ndryshe mbajti Kreshnik Çollaku i grupit “Basha”. “Duke bllokuar parlamentin, bllokojmë veten, opozitarizmin dhe kritikat ndaj mazhorancës”, tha deputeti. Duke iu përgjigjur interesit të gazetarëve për kërkesën e grupit parlamentar demokrat për zëvendësimin e Enkelejd Alibeajt si bashkëkryetar i reformës, Çollaku u shpreh se propozimi është “i pandershëm”. “Nëse Nikolla do pranonte emrat dhe listën e propozuar nga Bardhi, praktikisht do të asgjësonte nga asgjësimi PD, është cenim i të drejtës Kushtetuese”, tha ai.
