Aksioni opozitar për bllokimin e zhvillimit normal të punimeve të Kuvendit vijoi edhe këtë të Premte, në komisionin e posaçëm të Reformës Zgjedhore.
Deputetët demokratë bllokuan ulëset e kolegëve socialistë, ndërsa mes palëve pati debate. “Nuk lejojmë ‘Rama reformë’”, iu drejtua Flamur Noka-Damian Gjiknurit. Në fund, deputetët e PS-së braktisën sallën e mbledhjes.
Arsyeja e konfliktit, siç kanë artikuluar deputetët e opozitës, është përbërja e komisionit të posaçëm. Deputetët demokratë kërkojnë zëvendësimin e Enkelejd Alibeaj me Oerd Bylykbashin si bashkëkryetar i komisionit, me argumentin se ai nuk përfaqëson opozitën. Gjithashtu, kërkojnë edhe zëvendësimin e deputetëve në komision që përfaqësojnë “grupin Basha”.
Alibeaj nuk u pa të hynte në komision këtë paradite. Por në një deklaratë për mediat më herët gjatë ditës, ai tha se nuk ka ndërmend të tërhiqet nga posti, duke u shprehur se përfaqëson Partinë Demokratike.
Kreu i grupit parlamentar të PD-së, Gazment Bardhi deklaroi se është mazhoranca ajo që po bllokon komisionin, duke mos lejuar përfaqësimin e opozitës.
“Sot opozita s’ka bllokuar komisionin. Është mazhoranca që ka bllokuar pjesëmarrjen e opozitës. Rama s’ka ndërmend të bëjë zgjedhje të lira dhe të ndershme prandaj nuk dëshiron përfaqësuesit e opozitës në komision. Opozita dëshiron të marrë pjesë, por nuk po lejohet. Opozita dëshiron të mbyllë në një kohë sa më të shpejtë reformën zgjedhore, por ajo po mbahet peng nga mazhoranca”, tha Bardhi në një prononcim për gazetarët pas dështimit të mbledhjes.
Nga kampi socialist nuk ka shenja për lëshim. Përkundrazi, kryetari i komisionit nga radhët e PS-së Damian Gjiknuri u shpreh se puna do të vijojë në mënyrë të njëanshme.
“Nëse opozita nuk do të bëhet pjesë, do të gjejmë një mënyrë që Reforma të eci përpara”, tha Gjiknuri për gazetarët.
