Nga Boldnews.al
Kryeministri dhe kryetari i Bashkisë së Tiranë po “përkëdhelin” Prokurorinë e Posaçme Kundër Korrupsionit dhe Krimit të Organizuar, e “pagëzuar” si SPAK-u. Kreu i këtij institucioni, Altin Dumani, ka kërkuar disa herë ambiente të reja. Fillimisht, i erdhi në “ndihmë” Erion Veliaj, duke i dhuruar një godinë me vlerë 5 milionë euro. Ky “donacion” vjen në një kohë që vetë Veliaj apo drejtorët e Bashkisë së Tiranës po hetohen për aferën e inceneratorëve. Ndërkohë, edhe Rama ka vijuar me ndihmat, pasi Ministria e Financave i ka shtuar buxhetin kësaj strukture për vitin 2024. Një pjesë e mirë e parave edhe për ndërtimin dhe rikonstruksionin e godinës së re të SPAK-ut.
Sipas dokumenteve që ka siguruar redaksia e BoldNews.al, ministria e Financave i ka shtuar së tepërmi fondin kësaj akuze. Dhe menjëherë, Prokuroria e Posaçme Kundër Korrupsionit dhe Krimit të Organizuar, ka hapur një tender me objekt “ndërtim dhe rikonstruksion për godinën e re të SPAK”. Fondi limit i kësaj procedure është 127.867.415 lekë, ose me TVSH shuma shkon në rreth 1.5 milionë euro.
Ndërkohë, në Komisionin e Ligjeve, kreu i SPAK-ut Altin Dumani deklaroi disa muaj më parë se “po punojmë në ambiente përtej kapaciteteve”. “Është bërë një ndarje, një pjesë në vitin 2024, një pjesë në vitin 2025. Do ishte e mira të na jepej fondi i duhur buxhetor, për ta kthyer funksionale godinën brenda vitit 2024. Kjo bëhet funksionale vetëm nëse kemi fondin, pasi godinën e kemi, përballë zyrave tona është shumë afër dhe vijojmë punojmë tej kapaciteteve dhe s’mund të plotësojmë as stafin dhe organikën e kërkuar, pasi s’kemi ku t’i fusim punonjësit tanë”, tha Dumani.
Pra, ai bëri me dije se godina që kërkojnë është përballë SPAK-ut. Bëhet fjalë për një godinë në pronësi të Bashkisë së Tiranës, e cila është prokuruar nga ky institucion dhe ka qenë për Ujësjellës Kanalizime.
Disa kohë më parë, redaksia e BoldNews.al, denoncoi “dhuratën” që Veliaj i bëri SPAK-ut, e destinuar fillimisht për administratën qendrore të Ujësjellës-Kanalizimeve të Tiranës. Godina ndodhet përballë Gjykatës së Posaçme, në rrugën “Jordan Misja” në Tiranë, është në përfundim një godinë luksoze 6-katëshe. Këshilli Bashkiak i Tiranës miratoi në 12 Korrik 2022 propozimin e kryebashkiakut Erion Veliaj, për të dorëzuar çelësat e ndërtesës me vlerë rreth 5 milionë dollarë në duart e Prokurorisë së Posaçme.
“Përfituesi është e njëjta strukturë hetimore që, si rregull, duhet të ketë nën hetim Veliajn, për përfshirje në rol të dorës së parë në aferën e shumë-debatuar të ndërtimit dhe funksionimit të inceneratorit të Tiranës nga një grup kompanish private, me figurë përfaqësuese biznesmenin e shpallur në kërkim, Klodian Zoto” shkruante BoldNews.al.
Sipas dokumenteve, Bashkia e Tiranës ka bërë tenderin me objekt “Ndërtim i godinës së re të Ujësjellës-Kanalizimeve Tiranë”, me fond limit 480 milionë lekë të reja pa TVSH ose rreth 5 milionë USD, së bashku me TVSH.
