“Fiks Fare” denoncoi mbrëmjen e së enjtes një problematikë që ka prekur cilindo që ka një automjet.
Gjithkush ka pasur dyshime për vendosjen e gjobave vend e pavend nga policia rrugore, ajo e rendit apo edhe policët bashkiakë. Rasti që u trajtua në emisionin investigativ ishte për një gjobë të vendosur nga Policia Bashkiake në Durrës. Megjithëse automjeti i qytetarit ishte fizikisht në Tiranë, ai kishte marrë gjobë në qytetin bregdetar për parkim të gabuar!
Në redaksinë e Fiksit u ankua z. Ndrec Voci. “Në datën 14 nëntor 2023 më kanë vendosur një gjobë na makinën “Volswagen Golf 5” në Durrës. Gjoba ishte 2 mijë lekë të rinj. Ishte vendosur për parkim të gabuar. Iu drejtova Fiksit se gjoba është e padrejtë. Në atë ditë unë s’kam qenë fare në Durrës te vendi ku ishte vendosur gjoba. Makina ka qenë në Tiranë. Gjobën e kam mësuar pas 1 muaji, kur më ka ndaluar policia rrugore dhe më tha ke 1 gjobë”- thotë qytetari.
Ai tha se është interesuar te Policia Rrugore dhe i kanë thënë se gjoba është vendosur nga Policia Bashkiake e Durrësit. “Telefonova Policinë Bashkiake të Durrësit dhe kërkova policin Arjet Rrapa, që ishte te fleta e gjobës. E pyeta për gjobën dhe më dërgoi në whatsapp një foto tjetër të një makine që i ishte vendosur gjoba. Ajo makinë kishte targë AB 734 JD. Ndërkohë, në fletën e gjobës targa ishte shkruar AB 434 JD, targa e makinës sime. Pra, ishte ngatërruar numri 7 me 4”- vijon ai. Më tej pohon se sapo ka mësuar për kundërvajtjen rrugore, e ka paguar menjëherë, pasi është titull ekzekutiv.
“Gjoba kishte shkuar 25 mijë lekë të vjetra. Kam telefonuar policinë dhe më ka marrë një numër në telefon. Mësova se personi ishte vetë polici Arjet Rrapa. Më dërgoi foton e makinës që i kishte vënë gjobën, ishte me targë AB 734 JD. Ndërkohë në fletë ishte targa e makinës sime. I kërkova që të më transferonte paratë e gjobës dhe plus 1 ditë pune 35 mijë lekë. Fillimisht pranoi dhe më pas jo njëherë kam një vdekje, jo kam punë. Edhe sot e kësaj dite s’mi ka paguar. Kur e marr në telefon as më hap më telefonin. Unë dyshoj se mund të jetë ndonjë skemë më e madhe. Më shumë për fenomenin sesa për paratë. Prandaj iu drejtova edhe Fiksit”– thotë z. Voci. Ai tenton që të kontaktojë me policin rrugor Arjet Rrapa, por ai nuk i hap telefonin.
Pas denoncimit, grupi i Fiks Fare shkon në Policinë Bashkiake të Durrësit. Kërkojnë policin Arjet Rrapa, teksa punonjësit i bëjnë me dije se polici është në shërbim. Gazetarët i kërkojnë që të shkojnë atje ku është me “punë” polici. Punonjësi telefonon shefin e tij, i cili thotë se ankimet për gjobat bëhen në bashki.
Gazetarët telefonojnë policin bashkiak Arjet Rrapa. Fillimisht i tregojnë të gjithë problematikën. Polici përgjigjet fillimisht se mund ta ketë bërë gabim. Fiksi i thotë jo “mund, por e ka barë gabim numrin dhe përse nuk kontakton me qytetarin”. Rrapa përgjigjet se do t’ia paguajë atë gjobën, por ka pasur rast vdekje dhe s’ka pasur kohë. Fiksi e pyet disa herë se si mund të ndryshohet targa. Fillimisht, Rrapa thotë se mund ta ketë bërë gabim salla operative. Pyetjes nëse fleta e gjobës është apo jo e saktë, ai përgjigjet se “duhet ta shohë”. “Edhe mund të gabojmë se njerëz të gjallë jemi”- përfundon ai. Fiksi siguroi fletën e gjobës, ku rezulton se gabimi është bërë pikërisht nga ky punonjës. Në vend të numrit 7 ka vendosur numrin 4, çka ka rezultuar targa e denoncuesit, makina e së cilit ka qenë në datën 14 nëntor 2023 fizikisht në Tiranë dhe jo në Durrës!/ TCH
