Presidenti francez Emmanuel Macron ka pranuar këtë hënë dorëheqjen e kryeministres së Francës, Elisabeth Borne. Lajmin e ka konfirmuar vetë zyra e presidentit francez.
Dorëheqja e Borne vjen pas tensioneve të fundit politike në Francë për shkak të reformës së kontestuar të sistemit të pensioneve dhe ligjit të imigracionit të mbështetur nga Macron për të dëbuar disa të huaj.
Borne ishte emëruar në maj 2022 pas rizgjedhjes së Macron për një mandat të dytë. Ajo ishte kryeministrja e dytë femër e Francës. Deklarata nga zyra e Macron tha se Borne do të vazhdojë të trajtojë çështjet e brendshme derisa të emërohet një qeveri e re.
Macron pritej gjerësisht të riorganizonte Qeverinë e tij, pas pengesave legjislative dhe t’i jepte një shtysë të re presidencës së tij përpara Lojërave Olimpike të Parisit që do të mbahen këtë verë.
