Ka nisur protesta e mbështetësit të kreut të PD-së, Sali Berisha, para Gjykatës së Lartë ku do të mbahet seanca për vulën e Partisë Demokratike.
Ka prezencë të lartë të efektivëve të Policisë, ku ka patur dhe incidente me protestuesit të cilët kanë bllokuar qarkullimin e automjeteve në rrugën e “Myslym Shyrit”
“Ju mund të blini vulën, por kurrë opozitën”, “Opozita është frymë dhe jo vulë”, “Nuk mund të na i vidhni vulën”, janë disa prej pankartave që mbajnë në duar protestuesit.
Seanca në Gjykatën e Lartë ka nisur në orën 09:00, ku do të zhvillohet në Dhomë Këshillimi. Çështja do të shqyrtohet nga gjyqtarët, Artur Kalaja, Ervin Pule dhe Dariel Sina. Seanca do të zhvillohet në Dhomë Këshillimi.
Vendimi i parë për logon dhe vulën e PD-së u mor nga gjykatësi i Tiranës, Agron Zhukri në 25 mars 2022. Ai e konsideroi të ligjshëm kuvendin që ish-kryeministri Sali Berisha në 11 Dhjetor 2021. Sipas Zhukrit, procedura e ndjekur ishte e rregullt dhe e bazuar në statutin e kësaj force politike. Gjykatësi përcaktoi detyrimin që të gjitha ndryshimet statutore dhe ato për riorganizimin e strukturave partiake deri në zgjedhjen e organeve të reja drejtuese të reflektoheshin në regjistrin e partive politike.
Ky vendim i Zhukrit u dërgua në Gjykatën e Apelit nga grupimi i Enkelejd Alibeaj, i komanduar në atë kohë në krye të partisë nga Lulzim Basha. Në 3 mars të këtij viti, Gjykata e Apelit të Tiranës vendosi që të rikthejë çështjen në Shkallën e Parë pasi më parë kishte pranuar si palë edhe grupimin e Alibeajt. Vendimi Apelit u ankimua në Gjykatën e Lartë nga grupimi i Themelimit. Tashmë fati i vulës së PD-së është në Gjykatën e Lartë.
