Politologu Ilir Kalemaj duke folur në MCN TV tha se vendosja e masës “arrest shtëpie” për Berishën nuk do ta zhbëjë atë politikisht, pasi ai do të ruajë kuotat në radhët e mbështetësve, apo mund të forcohet me efekt bumerang.
Sidoqoftë, Kalemaj vë në dukje se as Berisha dhe as Argita Malltezi nuk janë në gjendje sot ta çojnë partinë në fitore përballë Edi Ramës. Politologu e sheh me rëndësi verdiktin final për Berishën, pasi nëse dënohet për VKM-të, atëherë ngrihet pyetja se çfarë do të ndodhë me Ramën. I pyetur mbi deklaratat e sotme të kreut të PD-së së Rithemelimit, Kalemaj nuk besoj se u është drejtuar përfaqësive ndërkombëtare.
“Nuk besoj se ai u është drejtuar ndërkombëtarëve. Besoj se do ishte non sens t’u tregosh përfaqësive diplomatike të kontrollojnë xhepat. Nuk mendoj se ka qenë ky konteksti. Mendoj që më shumë ka qenë referencë për palën kundërshtare, është në kuadër të një retorike politike që shpesh e kemi hasur rëndomtë. I vetmi problem që kemi me retorike është që ka kaluar në inflacion çdo gjë. Ne kemi sfumuar çdo lloj terminologjie. Kur shkohet drejt një gjuhe asgjësuese, ne vazhdojmë të qëndrojmë në rrafshin parapolitikë”.
I pyetur se çfarë ndodh me opozitën nëse ndryshohet masa e sigurisë për Berishën, Kalemaj shprehet:
“Nuk ka ndonjë risi të vërtetë në lidhje me procedurat që po ndiqen. Dimë që Berisha është person nën hetim, ndaj tij s’ka ende një akuzë të formuluar. Berisha në arrest shtëpie do shkojë, edhe për shkak të moshës, Kushtetutës, por rëndësi ka verdikti final. Nëse verdikti final do ishte që Berisha do dënohet për VKM, për vendime kolegjiale, atëherë çdo ndodhte me z.Rama?! Nëse Berisha po gjykohet për dosjen Partizani, z.Rama ka firmosur me fap fap fap vetëm te dosja e inceneratorëve, janë 17 vendime të firmosura brenda ditës. Nuk mendoj se kjo është një goditje e reputacionit të Berishës, apo që do ta zhbëjë komplet politikisht Berishën brenda sekondës. Përkundrazi besoj që ai jo vetëm do ruajë kuotat politike në radhët e mbështetësve, por përkundrazi mundet që paradoksalisht të forcohet, pra të jetë efekti bumerang. Problemi që ka Berisha dhe opozita shqiptare është më i thellë dhe strukturor. Problemi është a mund të vijë PD e Berishës në pushtet? Përgjigjia është jo, vetëm jo e jo, por edhe bashkë me aleatët. Tani i ka mbetur Bardhi me gjysmë zemre sepse s’e njeh si kryetar të partisë Berishën, dhe një bashkëjetesë e vështirë me Partinë e Lirisë”.
Kalemaj tha se Berisha deri më tani s’e ka mbajtur premtimin për hapje të partisë, por përkundrazi ka firo edhe në radhët e mbështetësve.
“Narrativa që i intereson elektoratit opozitar është a do të ketë ndonjë shans opozita shqiptare të vijë në pushtet, të mundë ndonjëherë Ramën. Nuk mendoj se znj.Malltezi mund të ketë ndonjë shans më shumë se Berisha elektoralisht që të mund Ramën. Ajo që premtoi Berisha kur i rimori Bashës partinë, ishte hapja e partisë, jo që të vazhdojnë të jenë po ata deputet, po ai grup mbështetësish militant. Jo vetëm s’ka prurje të reja, por ka firo, kjo u pa edhe nga protesta. Kemi parë që partitë e tjera të djathta s’janë pozicionuar me asnjërën palë, madje kanë dalë me idetë e tyre. Nuk shoh të ketë kolaudim interesash, ku interesi që duhet të prevalonte ishte si të mundej qeveria e Ramës. Edhe këto thirrjet për qeveri teknike dhe zgjedhje të parakohshme, janë në dëm të opozitës. Sepse opozita nëse do shkonte tani në zgjedhje është tërësisht e shpartalluar. Problemi kryesor që ka opozita në Shqipëri është egoja personale, ku gjithsecili po përpiqet të shpëtojë lëkurën e vet dhe jo të sjellë opozitën në pushtet”.
