Rreth 7 minuta e 30 sekonda zgjati këtë të enjte seanca plenare, duke vijuar anomalinë që po ndodh prej disa javësh tashmë, për sa i përket kohës së shkurtër të mbledhjeve parlamentare.
Mazhoranca votoi e vetme disa prej nismave në rendin e ditës, mes tyre edhe buxheti për vitin 2024, ndërsa rrëzoi amendimet e deputetëve të opozitës. Këta të fundit hodhën shashka dhe tymuese në sallë, në shenjë proteste ndaj sjelljes së mazhorancës. Mazhoranca sipas tyre, po u mohon të drejtat kushtetuese si krijimi i komisioneve hetimore apo përcaktimi i përbërjes së ekipit të PD në komisionin për reformën zgjedhore.
Tensionet u shfaqën që para nisjes së seancës mes deputetëve të opozitës dhe punonjësve të gardës. Këta të fundit, të pranishëm në numër më të shtuar se zakonisht në parlament, tentuan të ndalonin deputetët e PD që të grumbullonin karriget para foltores së Kuvendit.
Me nisjes e seancës, deputetët demokratë, përveç tymueseve, këtë herë hodhën dhe shashka. Drejtuesja e Kuvendit Lindita Nikolla njoftoi përjashtmin e deputetit Dogjani, teksa ky i fundit valëviste një tymuese.
Me të njëjtën lëvizje si seancat paraardhëse, Lindita Nikolla vendosi që të shmangë diskutimet duke kaluar për votim projektligjet në rendin e ditës. Me votat e mazhorancës, socialistët miratuan me shumicë të thjeshtë projektligjet që kanë mbështetur, mes tyre dhe buxheti për vitin e ardhshëm. Nga ana tjetër, përdorën forcën e kartonit për të rrëzuar disa amendamente në projektligjin për buxhetin të deputetëve të opozitës Zheni Gjergji dhe Bujar Leskaj.
Kjo u vu në dukje edhe nga kolegu i tyre Ervin Salianji në një prononcim për gazetarët pas përfundimit të seancës.
“Ja ku kishte amendime (nga PD), (mazhoranca) i hodhi për dy sekonda. Ne s’po lëmë që vendi të shkojë në një regjim të plotë, pasi 90 përqind e institucioneve janë kapur. Vetëm ky institucion (Kuvendi) ka mbetur”, tha Salianji jashtë ambienteve të parlamentit.
E revoltuar para mediave u shfaq dhe deputetja Zheni Gjergji, amendamenti i së cilës që parashikonte ndihmë buxhetore për gratë e prekura nga kanceri i gjirit, u hodh poshtë nga mazhoranca.
“Mazhoranca miratoi buxhetin dhe u dha koncesioneve të shëndetësisë 50 milionë euro dhe në amendamentin tim kërkova 6 milionë euro për 3 mijë gra që përballen me kancerin e gjirit. Me 75 vota kundër të mazhorancës hodhën poshtë amendamentin. 3 mijë gra do të enden rrugëve. Kjo është qeveria Rama. Mazhoranca miraton me forcën e kartonit fondet miliona euro për koncesionet”, tha Gjergji.
Nga kampi tjetër, kreu i grupit parlamentar të PS-së Bledi Çuçi tha se opozita po sillet në mënyrë “barbare”. Duke iu përgjigjur interesin e gazetarëve për moslejimin e komisioneve hetimore, Çuçi këmbënguli se lëvizja është në përputhje me Kushtetutën, duke konfirmuar mosndryshimin e qasjes së mazhorancës për të mos lëshuar pavarësisht kërkesave dhe aksionit të PD.
Në seancën e sotme, ishte prezent kryeministri Edi Rama, i cili zakonisht i ka bojkotuar mbledhjet e fundit të parlamentit. Ndërkohë, mungonte kreu i PD-së Sali Berisha, për shkak se u përjashtua nga komisioni i etikës me votat e PS bashkë me disa prej deputetëve të tjerë të opozitës.
