Sekretariati i Eikës ka përjashtuar me nga 10 ditë nga aktivitetet parlamentare 6 deputetë të Partisë Demokratike. Vendimi u mor pas kërkesës së Partisë Socialiste, e cila i konsideronte ata si përgjegjës për tensionet e shkaktuar në seancën e kaluar plenare më 4 Dhjetor.
Më konkretisht është përjashtuar me nga 10 ditë nga aktivitetet parlamentare kreu i PD-së Sali Berisha, kreu i grupit parlamentar të PD-së, Gazment Bardhi, si dhe deputetët Flamur Noka, Albana Vokshi, Elda Hoti dhe Edi Paloka.
Në kërkesën e firmosur nga 7 deputetë të PS thuhet se Sali Berisha zaptoi foltoren, Bardhi ofendoi deputetin socialist Petro Koçin, Edi Paloka tentoi ta godiste atë, ndërsa Flamur Noka i ndihmuar nga dy deputetet Vokshi e Hoti ndezi flakadanëve, njërin prej të cilëve e hodhi në drejtim të kryeparlamentares Lindita Nikolla.
Gjithsesi, vlen të theksohet fakti se si Berisha dhe Bardhi kanë deklaruar se pavarësisht përjashtimeve, ata nuk do ta ndalin aksionin në Kuvend, deri në plotësimin e kërkesave për ngritjen e komisioneve hetimore.
