Afrimi i festave të fundvitit përkthehet edhe në rritje të shpenzimeve për familjet shqiptare për të blerë lodra për fëmijët, të cilat janë kthyer në traditë. Ndërsa duke e parë në optikën e biznesit, duket se po ndjek trend pozitiv, kjo edhe për shkak të interesit të shtuar për blerjen e këtyre produkteve.
Të dhënat zyrtare të Drejtorisë së Përgjithshme të Doganave të siguruara nga SCAN TV, tregtojnë se përgjatë periudhës Janar-Nëntor 2023 janë importuar 1.7 ton lodra, me vlerë afro 1.3 miliardë lekë apo 13 milionë dollarë. E thënë ndryshe, përpos shpenzimeve të tjera për fëmijët, si ushqim, veshje , shkollim, argëtim, vetëm me lodra, shqiptarët shpenzojnë 13 milionë dollarë në më pak se një vit.
Por cilat janë shtetet që furnizojnë tregun e lodrave në Shqipëri?
Sipas të dhënave zyrtare, peshën më të madhe e zë Kina, shtet nga i cili vlera e lodrave të importuara gjatë këtij viti arrin në 5 milionë dollarë.
Në vendin e dytë renditet Greqia, nga e cila marrim afro 2 milionë dollarë lodra fëmijësh. Ndjekur nga Italia, shtet i cili na sjell 1.7 milionë dollarë. Po ashtu një peshë të konsiderueshme zënë importet nga Turqia, Serbia, Sllovenia dhe Maqedonia e Veriut.
Në total janë 51 shtete nga ku furnizohemi me këto produkte, ku nuk bëjnë përjashtim as vende si India, Indonezia, Malajzia, SHBA-etj.
