Kryedemokrati Sali Berisha ka mbajtur 1 minutë heshtje në nderim të aktorit të mirënjohur, Zef Deda, në fillim të konferencës për media.
Berisha u shpreh se sot është ditë zie për artin shqiptar, duke u shprehur se dielli perëndoi përfundimisht për artistin e talentuar.
Ish-kryeministri deklaroi se Zef Deda ia kushtoi që të gjithë dhuntinë e tij të vërtetave të mëdha të artit dhe shoqërisë.
“Sot është ditë zi e për artin, skenën, Shkodrën dhe artdashësit në mbarë Shqipërinë pasi dielli perëndoi përgjithmonë për artistin e mirënjohur të talentuar Zef Deda, ishte një artist që të gjithë dhuntinë e tij ia kushtoi të vërtetave të mëdha të artit dhe shoqërinë. Ai u nda nga jeta para kohe, duke pasur mundësi për të kapur maja të tjera në skenë dhe art.
Por mbetet i pavdekshëm me trashëgiminë e tij të shkëlqyer që le. Shpreh ngushëllimet më të ndjera familjes, të afërmeve, komunitetit artistik dhe qytetarëve të Shkodrës e mbarë Shqipërisë për këtë humbje të madhe. E nderojmë me një minutë heshtje, Zef Dedën”, tha Berisha.
Edhe kryeministri Edi Rama ka shprehur ngushëllimet për ndarjen nga jeta të aktorit të humorit, Zef Deda. Me anë të një postimi në Facebook, Rama shprehet zemërthyer për humbjen e Dedës, ndërsa shkruan “Lamtumirë i dashur Zef”.
Kryetari i Partisë së Lirisë, Ilir Meta, me anë të një mesazhi në Facebook, Meta shprehet: “Kujtimi i Zef Dedës do të mbetet i përjetshëm në zemrat e të gjithë shqiptarëve”.
“Një humbje e madhe për humorin dhe artin shqiptar ndarja nga jeta e aktorit shumë të dashur për publikun, Zef Deda.
I shpreh ngushëllimet e mia të përzemërta familjes Deda.
Kujtimi i Zef Dedës do të mbetet i përjetshëm në zemrat e të gjithë shqiptarëve”, thekson ish-Presidenti.
“Sot u shua ikona e humorit, Mjeshtri i Madh, Zef Deda! Lajmi për ndarjen e tij nga jeta prek çdo shqiptar që ka shijuar humorin dhe artin e mjeshtrit të pazëvendësueshëm shkodran. Lamtumirë njeriut që solli gëzim në shtëpitë e shqiptarëve edhe në momentet e vështira”, shkroi në rrjetet sociale Presidenti Bajram Begaj.
Personazhe të tjerë të politikës shprehën ngushëllime përmes reagimeve publike, për ndarjen nga jeta të aktorit.
