“Autori i vërtë prapa asaj që ndodhi në demonstratën e 21 Janarit të vitit 2011 është Edi Rama.” Kështu është shprehur kreu i PD-së, Sali Berisha gjatë konferencës së sotme me gazetarët, teksa po komentonte vendimin e Gjykatës së Strasburgut në lidhje me vrasjen e Aleks Nikës.
Berisha u shpreh se nëse ajo ngjarje nuk është hetuar siç duhet, është vetëm për shkak se pas saj qëndron Edi Rama, i cili sipas tij, rrethoi kryeministrinë me banda dhe banditë, në një protestë më të dhunshmen në historinë e vendit.
Lideri demokrat theksoi më tej se procesi gjyqësor, në masën 80% është hetuar, pasi ai ka ikur nga pushteti dhe për më tepër është hetuar nga Ina Rama, një militante e verbër e PS-së, sipas tij. Ai tha se ka kërkuar një prokuror ndërkombëtar për ta hetuar çështej, por Ina Rama ka refuzuar.
Në lidhje me vendimin e Gjykatës së Strasburgut, Berisha tha se aty ndodhet dhe firma e Dorian Pavlit, kushëririt të Edi Ramës dhe sipas tij, po të kishte qenë një gjykatës tjetër shqiptar, do të mund të kishte sqaruar gjykatësit e nderuar të Strasburgut. Berisha tha se Dorian Pavli, ka qenë aty njëkohësisht avokat i Edi Ramës dhe se nuk ka qenë gjykatësi përfaqësues i paanshëm i Shqipërisë, sipas tij.
“Jam 100 përqind dakord për hetim dhe rihetim të çdo procesi. Por sqaroj shqiptarët se nëse ai proces nuk është hetuar siç duhet, ai nuk është hetuar vetëm për shkak të Edi Ramës. Për të mbrojtur Edi Ramën, i cili është autori i vërtetë prapa asaj që ndodhi. I cili erdhi dhe e rrethoi kryeministrinë me banda dhe banditë, në një protestë më të dhunshmen në historinë e vendit. Me qëllime të caktuara ndaj pushtetit. Edi Rama i ka të gjithë deklaratat e tij në televizion, se kur populli do të bëjë këtë, se kur populli do bëjë atë. Kështu që ishte ky kontekst që bëri që Ina Rama dhe jo akuzat e mia ndaj Ina Ramës. Se unë publikisht i bëra të qartë qëndrimet ndaj saj, të mos bëjë, ndoshta siç thotë Strasburgu, hetimin e duhur.
E dyta, ky proces, në masën 80 përqind është hetuar pasi Sali Berisha ka ikur nga pushteti. Dhe është hetuar nga Ina Rama, një militante e verbër e PS, një person me kredencialet më të ulëta që mund të ketë një njeri. Ua them unë se kanë dalë shumë gjëra mbrapa. Dhe një person, që kur përfaqësuesi i qeverisë amerikane, erdhi dhe dha një kontribut të madh në atë kohë, e them me shumë vërtetësi, dhe unë kërkoja një prokuror ndërkombëtar për hetim, ajo refuzonte. Dhe aty, lexoni se çfarë tha zoti Countryman për Ina Ramën. I keni deklaratat në median tuaj.
Natyrisht nuk mund të mos them këtu, se keqardhja ime është se në atë vendim, ndodhet firma e Dorian Pavlit, kushëririt të Edi Ramës. Po të kishte qenë një gjykatës tjetër shqiptar, do të mund të kishte sqaruar gjykatësit e nderuar të Strasburgut, për të cilët unë them përsëri, për hetimin le të bëhet dhe ribëhet sa herë të jetë e nevojshme, do kishte sqaruar se kushëriri i Dorian Pavlit, është nxitësi kryesor i asaj që ndodhi, nga jashtë, me fakte dhe dokumente. Do kishte sqaruar se Ina Rama është një militante e partisë së Edi Ramës, e cila nuk bëri hetimin sepse i duhej të thërriste Edi Ramën. Sepse komuniteti ndërkombëtar kërkonte në mënyrë të prerë që të hetohen organizatorët dhe autorët e asaj që ndodhi. Po duket Dorian Pavli, ka qenë aty njëkohësisht avokat i Edi Ramës. Nuk ka qenë gjykatësi përfaqësues, i paanshëm i Shqipërisë.” – u shpreh Berisha.
