Prokuroria e Posaçme (SPAK) ka kërkuar 4 vite burgim për Joana Duron, ish-Sekretaren e Përgjithshme e Ministrisë së Shëndetësisë, e cila akuzohet për korrupsion pasiv. Gjithashtu, për ish-numrin dy të Ministrisë së Shëndetësisë është kërkuar dhe dënim plotësues me 5 vite heqjen e të drejtës për të mos ushtruar funksione publike.
Ndërkohë, SPAK ka kërkuar 1 vit e 6 muaj burgim për Laura Shteto, specialiste e Nivelit të Lartë të Agjencinë e Ofrimit të Shërbimeve Publike të Integruara. Ndërsa për Vladimir Topi, administratori i kompanisë “Dricons” prokurori Dritan Prençi ka kërkuar 2 vjet burgim dhe 1 vit e 6 muaj burgim për Silvi Shehin.
Tre të pandehur Laura Shteto, Vladimir Topi dhe Silvi Shehi akuzohen për veprën penale korrupsion aktiv.
Joana Duro u arrestua më 2 qershor pasi rezultoi se kishte përfituar ryshfet në vlerën 330 mijë lekë të reja për të favorizuar shoqërinë “Dricons” sh.p.k në një procedurë prokurimi.
SPAK sqaron se kjo shoqëri kishte fituar fazën e parë të një tenderi të shpallur nga Ministria e Shëndetësisë dhe Mbrojtjes Sociale për LOT 1,“Supervizim për rikonstruksionin e disa Qendrave Shëndetësore në Qarqet Tiranë dhe Durrës”, me fond limit 805 mijë lekë.
