Foshnja e cila u gjet e braktisur në garazhin e një pallati në Yzberisht (Tiranë) një ditë më parë, ka humbur jetën mëngjesin e kësaj të enjte në spitalit Obstetrik-Gjinekologjik “Koço Gliozheni”.
Foshnja e sapolindur e gjinisë mashkull është gjetur i braktisur nga një prej banorëve të pallatit, ndërsa më pas janë njoftuar autoritetet.
I vogli u transportua në spital, ndërsa një hetim nisi për zbardhjen e ngjarjes së pazakontë.
Vetë materniteti “Koço Gliozheni”, bëri me dije se foshnja u soll në një gjendje të rëndë traumatike dhe pasi i është dhënë ndihma e parë, pas shumë përpjekjesh u arrit që të rikthehej në jetë, edhe pse në gjendje të rëndë. Megjithatë, ndërroi jetë në orën 10:45 të së enjtes. Diagnozat klinike të foshnjes ishin: Lindje në term; Lindje per vias vaginalis; Hipotermi e thellë; Politraumë; Hemorragji pulmonare; Insufiçience multiorganore; Arrest kardiorespirator.
Dëshmia e nënës
Mbrëmjen e djeshme, policia njoftoi identifikimin e dhe shoqërimin e 30-vjeçarejes si autore e dyshuar e braktisjes së foshnjës. “Pas identifikimit dhe shoqërimit, shërbimet e Policisë e kanë dërguar 30-vjeçaren për ndihmë mjekësore në spital, dhe aktualisht ndodhet nën kujdesin e mjekëve”, thanë blutë.
Në dëshminë për autoritetet, thanë burime policore, e reja ka deklaruar se arsyeja që e ka fshehur shtatzëninë dhe ka braktisur foshnjën, ka qenë për shkak se nuk ka dashur që të merrej vesh nga familja e saj, por edhe opinioni, pasi nuk është e martuar.
Grupi hetimor ka dyshime se 30-vjeçarja e ka lindur foshnjen e vetme në garazhin e pallatit dhe pasi e braktisi u rikthye në banesë. Sa i takon babait të foshnjës, ajo nuk ka dhënë ende asnjë detaj.
Këtë të enjte, policia konfirmoi arrestimin e së resë: “Specialistët për Hetimin e Krimeve të Komisariatit të Policisë Nr. 6 kanë arrestuar shtetasen E. I., 30 vjeçe, banuese në Tiranë, për veprën penale ‘Braktisja e fëmijëve të mitur'”.
