Grabitjet në shtëpitë e të famshmëve duket se po kthehen në një trend të rrezikshëm. Sergio Ramos dhe familja e tij ishin të fundit që e përjetuan këtë, por ata nuk janë të vetmit.
Së fundmi, media spanjolle Diario AS, ka bërë publike dëshminë e një grabitësi shqiptar i cili kishte hyrë për të vjedhur në shtëpitë e disa prej futbollistëve më të famshëm në Spanjë, mes tyre edhe Cristiano Ronaldo dhe Karim Benzema.
Shqiptari nga Kosova me nofkën “Alberto” ka zbuluar emrat e disa prej futbollistëve të cilëve ai dhe banda e tij u kanë hyrë në shtëpi për t’i grabitur.
- Benzema dhe Ronaldo në shënjestër të hajdutëve
Carlos Quílez, intervistoi shqiptarin nga Kosova ku temat e para të diskutimit ishin incidentet që përfshijnë shtëpitë e Karim Benzema, Cristiano Ronaldo dhe Johan Cruyff.
“Shtëpinë e Benzemas kemi arritur ta grabisim njëherë” tha Alberto. “Ne gjithashtu tentuam vjedhjen në shtëpinë e Cristianos në Madeira, por përfitimi nuk ishte joshës.”
Në vitin 2012, grabitësit shënjestruan shtëpinë e Cruyff-it, megjithëse ata hynë në rezidencën e tij fillimisht pa e kuptuar se ishte e tija. Mirëpo, sapo u futën brenda, vunë re fotot e tij me Dennis Bergkamp. Ata arritën t’i vidhnin nga shtëpia e tij sende me vlerë që kapin vlerën e rreth 20,000 euro.
I pyetur për Messin, grabitësi shqiptar i cili është në arrati ka surprizuar me përgjigjien e tij, duke thënë se nuk do ta bënte kurrë diçka të tillë në shtëpinë e argjentinasit.
Ai deklaroi se kishte pasur mundësi, por nuk kishte dashur ta bënte për shkak të respektit që kishte për Messin, duke shtuar se ka ndaluar edhe persona të tjerë të cilët donin të grabisnin Messin.
“Kam ndaluar disa herë njerëzit që donin të grabisnin shtëpinë e Messit, njerëzit që më kërkonin, por nuk mund t’i ndaloj të gjithë… Këtë herë munda dhe jam shumë krenar për këtë.”- tha ai.
Alberto, thuhet se komandon më shumë se 100 persona që “varen prej tij ose kërkojnë lejen dhe informacionin e tij për të kryer vjedhjet. Kjo është arsyeja pse ai ka kapacitetin për të siguruar që grupet e tjera të mos kryejnë depërtime specifike, përfshirë ato që përfshijnë Messin.
