Nga Boldnews.al
Pak minuta shi i dendur dhe Tirana notoi në llumin e ujërave të zeza dhe bllokim të rrugëve në shumë zona. Ky shi në fakt lau makiazhin e përditshëm që Bashkia Tiranë me drejtuesin e saj bën çdo ditë në kryeqendrën e vendit. Tirana e sipërfaqes është ajo e kullave, e bojatisjes, e vizave, apo tallavasë së koncerteve, por poshtë saj fshihet batërdia e abuzimit të pushtetit lokal dhe mjafton vetëm 25 minuta shi për të nxjerrë të vërtetën në shesh.
“Ju lutem evitoni lëvizjet e panevojshme gjer sa reshjet të kullojnë dhe skuadrat tona të largojnë dhjetëra pemë të rëna nga stuhia”-shkruan kryebashkiaku Erion Veliaj në rrjetet sociale, sigurisht pa i pasur këmbët në ujë, pa vështirësinë e mbajtjes së fëmijëve në krahë mes shiut lart dhe lumit të zi gjer në gju.
Edhe këtë situatë me propagandë do e kalojë, pavarësisht mallkimit të qindra mijëra qytetarëve që iu nënshtruan furisë së ujit dhe përmbytjes pa shkak të qenësishëm. Asfalti elektoral i Lalit sot tregoi “ziftin e shpirtit” sterr të drejtuesve lokal të kryeqytetit. Mbulimi i gropave dhe rrugëve me asfalt, pak javë para zgjedhjeve, ishte truku që Lali Eri përdori për të rrëmbyer në çdo formë sa më shumë vota.
Pa asnjë kriter ndërtimi, mbi Tiranë u hodhëm mijëra tonelata asfalt, pa kryer më parë punimet e nevojshme inxhinierike nëntokësore si kanalizimet dhe trashetë e duhur me inerte lumore dhe çakull për kullimin e ujërave.
Mjafton ky makiazh elektoral për të mbuluar sytë e qytetarëve, por pak minuta shi të nxinë faqen, paçka se gjithnjë gjen një justifikim duke e bërë shiun e vjeshtës si “tsunam” që sjell përmbytje dhe shkatërrime.
“Orët e fundit Tirana është përfshirë nga një stuhi e fortë me reshje të shumta shiu, e ngjashme me stuhinë Ciaran që ka goditur Firencen dhe Toskanën gjatë natës”-shkruan Veliaj teksa justifikohet për gjendjen e krijuar në Tiranë. Nuk është rasti e parë dhe nuk do të jetë as i fundit që kryeqyteti të mbytet me “një lugë ujë” pikërisht nga infrastruktura skandaloze nëntokësore.
Tirana i përngjan një punonjëse seksi të natës që pudroset, lyen buzet, hedh parfum me grushta dhe vesh takat e larta për të nxjerrë në “tregun e epsheve” hiret e saj. Përtej pamjes së jashtme, mjafton që kjo “punëtore” të lahet në shi për t’i kuptuar se poshtë pudrës ka gropëza të thella në fytyrë, apo edhe puçra nga mungesa e higjienës.
Po ashtu edhe buzëve të trasha pasi u ikën i kuqi del botoksi, për të kaluar më pushtë ku silikoni ngjan si ato majat e kullave të qendrës së Tiranës. Megjithatë me bombardimin e propagandës “punëtorja” ia del të ushtrojë profesionin me makiazh të shtuar dhe të bërtasë pafundësisht për ndershmërinë e saj.
