Kreu i grupit parlamentar të PD-së, Gazment Bardhi ka deklaruar pas mbledhjes së grupit parlamentar se ditën e sotme do të depozitojnë kallëzim penal në SPAK për kryetaren e Kuvendit, Lindita Nikollën.
Në një prononcim për mediat, Bardhi u shpreh se Nikolla ka shpërduar detyrën duke lejuar futjen e gardistëve të armatosur në Kuvend. Sipas tij, asnjë veprim i dëshpëruar i Ramës dhe “kukullës së tij”, duke iu referuar Nikollës, nuk do e ndalojnë opozitën të kërkojë të drejtat e saj minimale.
“Shprehim indinjatën e thellë për sjelljen e sotme të kryetares së Kuvendit e cila lejoi në shkelje flagrante të ligjit futjen në sallë, pa pasur asnjë situatë, të punonjësve të gardës të cilët kanë qenë të armatosur. Për këtë arsye me urgjencë grupi parlamentar i Partisë Demokratike do të depozitojë kallëzim penal për shpërdorim detyra ndaj kryetares së Kuvendit e cila mendon se do të tremb ë opozitën me gardistë të armatosur. Mendon se do e ndalojë opozitën të ngrejë zërin për të drejtat e veta duke përdorur institucionet ligjzbatuese të këtij vendi.
Asnjë veprim i dëshpëruar i Edi Ramës dhe kukullës së tij në krye të Kuvendit nuk e ndal opozitën të kërkojë të drejtat e saj minimale. Është e drejtë kushtetuese e opozitës kërkesa për ngritjen e komisioneve hetimore, është e drejtë kushtetuese të kërkojë të përfaqësohet me kë dëshiron ajo në komisionet e reformës zgjedhore. Është e papranueshme që një kërkesë legjitime të deputetëve të opozitës t’i kundërvihesh duke përdorur autoritetin si kryetare kuvendin dhe duke i dhënë urdhra të paligjshëm punonjësve të gardës së republikës. Sot do të dorëzojmë kallëzimin penal në SPAK për znj. Nikolla për shpërdorim të detyrës.”, tha kreu i grupit parlamentar të PD.
Bardhi denoncoi faktin se ishte tentuar t’i ndalohej për të hyrë në zyrë.
“Pat një tentativë qesharake në mënyrë që hyra në zyrën time të punës në Kuvend. Nuk ka gardistë që ndalon opozitën të kërkoj të drejtat e veta kushtetuese. Iu ftoj të kërkoni edhe ju leje, të hyni në Kryesinë e Kuvendit, kati i dytë dhe i tretë i kësaj godine është mbushur me punonjës të Gardës së Republikës”, shtoi ai.
