Kryeministri i Kosovës, Albin Kurti dhe presidenti serb, Aleksandër Vuçiç zhvilluan takime me udhëheqësit evropianë këtë të enjte në Bruksel.
Ende pa dalë detajet e para të takimit Kurti-Vuçiç, kryeministri Edi Rama ka nxituar të reagojë për të mos fshehur lumturinë e këtij takimi dhe për t’u munduar të bëhet protagonist.
Në një reagim në rrjetet sociale, Rama shkruan se Kurti dhe Vuçiç, duhet të demonstrojnë lidership për të zbatuar Marrëveshjen Bazë mbi normalizimin e marrëdhënieve.
“Përgëzoj Kryeministrin e Kosovës për pranimin e propozimit të BE-së për të përparuar me vendosmëri drejt një zgjidhjeje zhbllokuese lidhur me AKSHS, përmes instrumenteve të vetëmenaxhimit si një kuadër për negociatat vijuese. Kjo është një pikë vërtetë kyçe. Udhëheqësit e Kosovës dhe Serbisë duhet të tregojnë lidership dhe të punojnë ngushtësisht, pa asnjë vonesë të mëtejshme, me aleatët perëndimorë të rajonit për të zbatuar menjëherë Marrëveshjen Bazë mbi normalizimin e marrëdhënieve. Rajoni ynë meriton paqe, stabilitet dhe bashkëpunim për një të ardhme të përbashkët më të mirë, dhe jo konflikte, lojëra fajësimi dhe prapakthime që na dëmtojnë të gjithëve”, shkruan Rama.
Kujtojmë që prej kohësh Rama ka marrëdhënie të “akullta” me homologun e tij Albin Kurti për shkak të qëndrimeve të kryeministrit të Shqipërisë në lidhje me konfliktin mes Kosovës dhe Serbisë. Rama i bëri thirrje KFOR-it që të marrë kontrollin e veriut ndërsa më pas deklaroi se zona e veriut është një territor që nuk i përket Kosovës, deklaratë që shkaktoi zemërim të madh në Shqipëri dhe Kosovë kundrejt Edi Ramës i cili përkrahu mikun e tij Aleksandër Vucic.
