Një i moshuar është arrestuar këtë të martë në Librazhd pasi është kapur me arsenal armësh në banesë.
Blutë bëjnë me dije se në pranga ka rënë shtetasi Q. Sh., 80 vjeç, banues në fshatin Koshorisht, pasi gjatë kontrolleve në banesë, u gjetën të fshehura 1 armë zjarri kallashnikov dhe disa fishekë luftarak. Ndaj 80-vjeçarit është caktuar masa “Arrest në shtëpi”.
“Në vijim të goditjeve të njëpasnjëshme të Policisë, kundër veprimtarisë kriminale të mbajtjes pa leje të armëve të zjarrit, si dhe pas një hetimi të ndjekur proaktivisht, në bashkëpunim me Prokurorinë e Elbasanit, për goditjen e një tjetër rasti në këtë fushë, shërbimet e Komisariatit të Policisë Librazhd kanë kryer kontrolle në banesën e shtetasit Q. Sh., në fshatin Koshorisht.
Gjatë kontrolleve në këtë banesë, u gjetën të fshehura 1 armë zjarri kallashnikov dhe disa fishekë luftarak, të cilët u sekuestruan në cilësinë e provës materiale.
Për pronarin e kësaj banese, shtetasin Q. Sh., 80 vjeç, prokurori i rastit, për shkak të moshës, kërkoi caktimin e masës së sigurisë “Arrest në shtëpi”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.