Vendet e BE-së kanë arritur një marrëveshje paraprake që i hap rrugë vendosjes së rregullave të përbashkëta për të menaxhuar fluksin masiv të azilkërkuesve.
Akordi mbi të ashtuquajturin Rregullorja e Krizave u nënshkrua gjatë një takimi të ambasadorëve të vendeve anëtare në Bruksel, që kishin për detyrë përfundimin e punës së nisur nga ministrat e Brendshëm, që nuk arritën ta çonin në fund javën e kaluar kur Italia papritur bllokoi draftin.
Italia kontestoi një pjesë të vogël të legjislacionit, të përqendruar në shërbimet e kërkim-shpëtimit që ofrohen nga varkat e OJQ-ve në detin Mesdhe, të cilin Roma e konsideron një faktor që do të tërheqë më shumë emigrantë në brigjet evropiane.
Gjermania, vota e të cilës ishte e nevojshme për të arritur shumicën e kualifikuar, mbrojti mjetet e përdorura nga OJQ-të me argumentin se shpëtimi i jetëve në mes të detit është një detyrë ligjore, humane dhe morale.
Pikërisht kontesti mes Romës dhe Berlinit bëri që javën e kaluar të dështonte arritja e marrëveshjes, pavarësisht shpresave të ngritura nga një draft kompromisi të ri të parashtruar nga Spanja, vendi që aktualisht mban presidencën e radhës të BE-së.
Por pasditen e së mërkurës, pas konsultimeve me qeveritë kombëtare përkatëse, ambasadorët arritën të tejkalojnë ngërçin.
