Sali Berisha bëri përgjegjës kryeministrin Edi Rama dhe qeverinë e tij për manipulimin që sipas kreut të PD-së, ndodhi në zgjedhjet e pjesshme të Kukësit.
“Në Kukës, siç kam referuar këtu për të gjitha, zgjedhjet u blenë në mënyrën më të pamëshirshme. Belinda Balluku, Taulant Balla, janë marrë me shpërndarje parash 1 javë rresht me thasë në qarkun e Kukësit. Në Kukës nuk përcaktoi rezultatin vota e qytetarëve, por rezultatin e përcaktoi qartësisht industria e blerjes së votës. Ne kemi një konkluzion, se me Edi Ramën, zgjedhje nuk ka”, u shpreh ai.
Deklaratat i bëri nga selia blu këtë të premte, në konferencën e përjavshme që mban me gazetarë, të cilët i kërkuan një koment lidhur me humbjen e zgjedhjeve në Kukës.
Për të mbështetur deklaratat se manipulimi i zgjedhjeve në Kukës, ishte zgjatim i manipulimit që qeveria bëri gjatë lokaleve të 14 majit, tregoi për ekzistencën e dy përgjimeve.
I pari, sipas tij, është një bisedë në një lokal në Kukës e regjistruar në mënyrë të fshehtë nga SHISH mes kreut të OSHEE-së së qarkut dhe një zyrtari të lartë socialist. Ky përgjim sipas tij, është në posedimin e Ramës, i cili e mban për qëllime shantazhi. Ndërsa tjetri, siç tha, është i kryebashkiakut të Gjirokastrës. Në këtë përgjim, shpjegoi, dëgjohet kryebashkiaku i cili udhëzon varësit për blerje votash. Ky material, shtoi, është depozituar në SPAK, por organi i akuzës e ka pushuar çështjen.
“Që në muajin prill, në një lokal në Kukës, janë ulur fatkeqësisht një zyrtar shumë i lartë i PS me drejtorin e OSHEE të qarkut. Tavolina ka pasur përgjues dhe në këtë përgjim është e regjistruar se është bërë pazari që drejtori i OSHEE do të bëjë një tender me kaq miliona lekë, nga të cilat 300 mijë euro do i dërgojë në Tropojë. 200 mijë në Kukës. Shtyllat do vendoseshin në Has. Dhe resti i kësaj në Durrës. Shërbimi informativ, që ka qenë institucioni që ka vendosur përgjuesin, përgjimin ia ka sjellë Edi Ramës. Nuk kam, se nuk do e akuzoja sot SPAK-un, nuk kam të dhëna se Rama e ka çuar në SPAK përgjimin, por sipas disa indiceve e mbajnë aty për të mbajtur peng zyrtarin”, tha Berisha.
“Nuk është vetëm kjo, nga institucioni i akuzës së Gjirokastrës, është dërguar në SPAK dosja me përgjimin, në të cilin kryetari i Bashkisë së Gjirokastrës, në një mbledhje urdhëron vartësit dhe u thotë: do u japësh kaq lekë, ti do i premtosh këtë vend pune. Pra, bën haptas ofertat për votat që do blinin. SPAK e mbyll dosjen dhe nuk ndërmerr asnjë veprim. SPAK nuk mund të ndërmarrë veprime kur ka dosjen e kriminelëve elektoralë Edi Rama, Damian Gjiknuri, Ulsi Manja”, shtoi ai.
Berisha tha se në këto kushte duhet të ketë protesta.
“Pra, çfarë mbetet? Mbetet të flasin qytetarët. Përgjegjësia është një: që duhet ngritur sa më shpejt në protesta”, u shpreh.
Gjatë fjalës së tij, Berisha tha se kryeministri Edi Rama është tronditur nga zhvillimet e fundit me çështjen “McGonigal”. Iu rikthye po ashtu deklaratave të Ramës për Kosovën, duke e akuzuar kreun e qeverisë se po vepron në favor të Serbisë. Berisha denoncoi po ashtu se kryebashkiaku i Tiranës, Erion Veliaj ka ndikuar në lehtësimin e akuzave ndaj Alqi Bllakos në çështjen e inceneratorit të Fierit.
