Vrasjet dhe krimet e tjera të rënda të ndodhura së fundmi në vend kanë sjellë ndryshime në radhët e policisë.
Këtë të premte, Policia e Shtetit konfirmoi se drejtori i Përgjithshëm Muhamet Rrumbullaku ka firmosur një sërë urdhrash për emërime/shkarkime nga detyra, me qëllim “dhënien e impulseve të reja forcës parandaluese, punës hetimore dhe forcës goditëse, ndaj krimit në përgjithësi dhe krimit të organizuar në veçanti”.
Të njëjtat burime shtojnë se një sërë ndryshimesh janë bërë pas atentatit të para tre ditëve në Rrëshen, ku u ekzekutua Martin Bardhi dhe u plagosën tre persona të tjerë. Ndryshime që sipas bluve i paraprinë një analize “për ndjekjen e kësaj ngjarjeje, si dhe për shkak të mostrajtimit/mosanalizimit të duhur të konflikteve ndërmjet fiseve në Rrëshen”.
Lëvizje ka pasur edhe në Fier, Berat e Pogradec.
Ndryshimet
Drejtori i Përgjithshëm i Policisë së Shtetit, Muhamet Rrumbullaku ka vendosur:
- Shkarkimin nga detyra të zëvendësdrejtorit për Hetimin e Krimeve të DVP Lezhë Drejtues Alfred Nomani dhe emërimin në këtë detyrë të Kryekomisar Gentian Berberi;
- Shkarkimin nga detyra të shefit të Sektorit për Rendin dhe Sigurinë të DVP Lezhë, Kryekomisar Artur Cara;
- Emërimin në detyrën e Zëvendësdrejtorit për Rendin dhe Sigurinë të DVP Lezhë, të Kryekomisar Altin Mena;
- Shkarkimin nga detyra të shefit të Komisariatit të Policisë Mirditë, Komisar Paulin Çupi dhe emërimin në këtë detyrë të Komisar Klodian Kondi.
Gjithashtu, janë bërë edhe lëvizje të tjera, që sipas policisë kanë “qëllim përmirësimin e punës së strukturave të Policisë së Shtetit”.
Konkretisht:
- Është shkarkuar nga detyra e zëvendësdrejtorit për Hetimin e Krimeve të DVP Fier Drejtues Artur Shira dhe është emëruar në këtë detyrë Komisar Arjan Hasani;
- Është emëruar në detyrën e Shefit të Komisariatit të Policisë Berat Kryekomisar Ermir Gërxhani;
- Është emëruar në detyrën e Shefit të Komisariatit të Policisë Pogradec Komisar Elton Halili.
