Dy adoleshentë janë arrestuar këtë të hënë nga policia, dhe një tjetër është shpallur në kërkim pasi akuzohen për grabitje.
Blutë bëjnë me dije se në bashkëpunim me njëri-tjetrin këta tre shtetas kanë grabitur një laptop dhe katër celularë, në dy dyqane me pajisje elektronike.
Në momentin që kanë konstatuar forcat e policisë, tre të rinjtë kanë tentuar të arratisen me makinë por janë përplasur me trafikndarësen dhe vetëm njeri prej tyre ka arritur të arratiset pasi dy të tjerët janë arrestuar nga policia.
“U vunë në pranga dy shtetas 16 vjeç, si dhe u shpall në kërkim një bashkëmoshatar i tyre, të tre banues në Tiranë.
Nga veprimet hetimore ka rezultuar se këta shtetas, ditët e fundit, kanë vjedhur një laptop dhe katër celularë, në dy dyqane me pajisje elektronike.
Pas informacioneve se autorët e dyshuar po qarkullonin të armatosur, me një automjet, në aksin rrugor Shkozë-TEG, shërbimet e Policisë kanë organizuar punën për kapjen e tyre. Gjatë ndjekjes, drejtuesi i automjetit është larguar dhe ka hedhur një armë zjarri pistoletë, nga dritarja e automjetit. Në tentativë për t’u larguar, drejtuesi i automjetit ka humbur kontrollin dhe e ka përplasur automjetin me trafikndarësen.
Në cilësinë e provës materiale u sekuestruan automjeti, një armë zjarri pistoletë, një laptop dhe 11 celularë”,- njofton Policia.
Materialet procedurale i kaluan Prokurorisë pranë Gjykatës së Rrethit Gjyqësor të Juridiksionit të Përgjithshëm Tiranë, për veprime të mëtejshme.
