Nga Boldnews.al
Më 6 korrik, Shqipëria pa filmin e jetës që ndodh çdo ditë. Djali, vëllezëriti dhe kushërinjtë e deputetit socialist Rrahman Rraja, rrahën rëndë duke i lënë në zgrip të vdekjes, dy kushërinjtë Bilbil dhe Jashar Maja, banorë të fshatit Borizanë në Fushë-Krujë, pasi ishin ankuar se nga shpërthimi në guroren e Rrajave u ishin prishur banesat. Filmimet e dhunës çnjerëzore u kryen dhe më pas u shpërndanë nga vetë dhunuesit, për të shtuar terrorin në zonë që askush të mos guxojë t’i kundërshtojë dhe aq më pak denoncojë në policinë që kontrollonin vetë. Tashmë kur sapo kanë kaluar dy muaj Rrajat do të kthehen përsëri, të lirë, më të fortë se kurrë, më të paprekshëm se kurrë dhe më të mbrojtur se kurrë nga pushteti që e ushqejnë me dhunë të Rilindur dhe prej saj marrin përfitime.
Dhuna shkaktoi zemërim publik, aq sa Rama për të shpëtuar lëkurën shkarkoi ministrin e Brendshëm Bledi Çuçi dhe njëkohësisht i kërkoi dorëheqjen edhe deputetit Rraja. Për spektakët dhe hedhje hi syve të publikut, disa pjestarë të dhunës u arrestuan, por kryesorët, përfshi vëllezërit dhe djalin e deputetit askush nuk i preku. Dhuna fizike u duk se u mbyll me aq, por dhuna psikologjike dhe propaganda e llumit vijoi gjatë. Ministri i ri Taulant Balla i kërkoi policisë që të arrestonte përgjegjësit e aktit të rëndë. Që nga ajo kohë, në atë zonë të ngushtë ku të gjithë e dinë ku hanë e pinë Rrajat, askush nuk i nget, për të thurur jo më larg se dy muaj më vonë planin sesi të dalin sërish të lirë, e madje të gatshëm të dhunojnë e shantazhojnë, për hir dhe nder të pushtetit.
Këtë radhë në ndihmë u ka ardhur gjoja një institucion i pavaruar, Prokuroria e Tiranës. Në shkelje të plotë ligjore kryen një kapërcim të frikshëm. Nga akuza e “plagosjes së rëndë me dashje e krye në bashkëpunim dhe mbajtje pa leje të armëve luftarake”, e kthyen në “plagosje të lehtë me dashje”. Kjo është dhunë dhe traumë më e rëndë se vetë dhuna fizike që e pësuan dy kushërinjtë Maja, por në fakt të gjithave na dhunuan. Secili qytetar mund të binte një herë qoftë edhe rastësisht në duart e Rrajave të pushtetit. Pas atij skandali që përfshiu edhe policinë e kapur në kupolë nga Rrajat, tashmë po shohim edhe prokurorinë e kapur, këtë drejtësinë që Rama vlerëson kaq shumë.
Në fakt ky nuk është vendimi i prokurorisë së “pavarur” por verdikti i majës së pushtetit. Si është e mundur që kryeministri Edi Rama dhe ministri Balla nuk reagojnë pas këtij sakandali më të madh se vetë skandali i 6 korrikut? Kryeministri Edi Rama dhe Ministri i Brendshëm Taulant Balla në javët e fundit nuk kanë lënë prokur e gjyqtar pa i sugjeruar e kërcënuar për të mos liruar asnjë fshatar që shkakton zjarre nga pakujdesia. Kërkuan dënime shembullore për ta dhe madje herë pas here kërcënonin se do verifikonin çdo gjyqtar dhe prokuror që zbuste dënimet.
Po çfarë thekson raporti mjeko-ligjor për dhunën ndaj dy kushërinjve. “Nëpërmjet të dhënave dhe konkluzioneve të aktit të ekspertimit mjeko ligjor, mësohet se, në trupin e shtetasit Bilbil Maja u konstatua thyerje kockash frontale-parietale të anës së djathte të kokës, demtime të indit trunor, plagë në lëkuren e kokës, thyerje e kockës ulnare të parakrahut të majte si dhe shembje të indeve të buta të kokës dhe të trupit, dëmtime të shkaktuar me mjet të forte”, thotë prokuroria. E megjithë këtë raport në duar me thyrje kockash e dëmtime të trurit “drejtësia e Rilindur” e quan plagosje të lehtë, pasi rrahësit me shkopa bejzbolli dhe qyta pistolete janë njerëzit e pushtetit. Ata i duhen më shumë se kurrë kryeministrit Edi Rama.
I nevojiten që të jenë të lirë, u nevojitet një popull i përulur nga dhuna, u nevojiten banorë që të rrihen nga pushteti e të mos bëjnë zë. U nevojitet polici që e di mirë ku qëndrojnë Rrajat e pushtetit të Ramës, por nuk duhet të preken deri kur “drejtësia që do kryeministri” të japë këtë version më shumë se të turpshëm por shumë domethënës: Rrajat duhet të rrahin sërish…! Pushteti ka nëvojë për kafka të thyera, dëmtime të indeve të trurit dhe fraktura gjymtyrësh…
