Pas rreth 1 orë e gjysmë, kreu i Partisë së Lirisë, Ilir Meta ka dalë nga selia blu ku zhvilloi një takim me kreun e Partisë Demokratike, Sali Berishën.
Gjatë deklaratës për mediat, Meta deklaroi se në takim është diskutuar si do të vijojë aksioni opozitar.
“Ështrë detyra e opozitës që të bashkojë të gjitha energjitë e saj në rivendosjen e shtetit të së drejtës. Përshëndes çdo iniciativë për bashkimin e të gjithë deputetëve të opozitës. Deputetët tanë janë gjithnjë në vijën e parë të opozitarizmit. Patjetër që do të ketë edhe një datë për protesta, e rëndësishme është që të ketë një aksion të bashkërenduar opozitar. Me këto rrethana ku skandalet e qeverisë dhe të korrupsionit të saj skizofrenik mbivendosen te njëri tjetri. Është detyra e opozitës të bashkojë të gjitha energjitë e saj. Ne jemi kudo ku kërkohet angazhimi dhe dega e Partisë së Lirisë do mbetet e hapur. Deputetët tanë janë çdo ditë dhe kur nuk ka parlament. Deputetë tanë janë cdo ditë në vijën e parë të ballafaqimit”, tha fillimisht Ilir Meta.
Ilir Meta u pyet sot nëse do e pranonte një propozim të mundshëm të aleatit të tij Sali Berisha për Gazment Bardhin si kandidat për kryeministër. Ndonëse nuk pati një përgjigje konkrete, Meta tha se jemi të angazhuar për të respektuar çdo parim demokratik.
Pyetje: Nëse do të jeni bashkë me Berishën dhe në 2025 dhe nëse ai propozon Gazment Bardhin për kryeministër do ta pranonit?
Përgjigjet Ilir Meta: “Nuk jemi këtu për t’u marrë me këto çështje. Ju e dini që ne jemi të angazhuar për të respektuar çdo parim demokratik”|
