Nga Boldnews.al
Një automjet tip Volksvagen Caddy, nga makinat e vogla që shpërndajnë fruta-perime, u ndal paraditen e sotme shumë pranë zonës së Rrugës së Elbasanit, nga një patrullë me dy Policë Bashkiakë.
Ata i treguan shoferit tabelën që nuk lejohet qarkullimi i mjeteve të furnizimit në Unazën e Tiranës brenda fashës orarë 07.00-09.00 të mëngjesit, me argumentin se “rëndon qarkullimin”.
Në momentin që policët bashkiakë po plotësonin pa përtim gjobën për shoferin e zarzavateve, në krah të tyre kaloi një kamion i rëndë, i kompanisë “Pepa Group”, i cili hyri serbes në zonën e Unazës së Vogël të kryeqytetit. Këto mjete të rënda nuk lejohen të qarkullojnë në Unazën e Mesme dhe të Vogël të kryeqytetit nga ora 6.00 e mëngjesit deri në 20.00 të mbrëmjes.
Bashkiakët e Veliajt as nuk guxuan të kthenin vështrimin nga automjeti i rëndë. I pyesim se përse bënë sikur nuk e panë dhe e lanë të qarkulloj atë automjet të rëndë, ndërkohë që “fakirin” me Caddy po e gjobisnin.
Na kthyen përgjigje të bezdisur: “Ka leje nga Bashkia, se merret me Rindërtimin”. Vijojmë dialogun: Po ku e patë ju që ka leje, pasi as lëvizët sytë për t’i parë targën, të paktën?
Ata lanë të kuptohet se e dinë shumë mirë se “kë duhet të shohin dhe kë jo”. Kush ka “leje” nga Lali Veliaj, bëhet i padukshëm.
Biseda ishte e tepërt të vijonte. Kamioni i ngarkuar me inerte i “Pepa Group” hyri në mes të mjeteve, në semaforin e Urës së Madhe tek ish-hotel “Dajti” dhe vijoi rrugëtimin pa ndërprerë dhe i pashqetësuar nga sytë vigjilentë të çdo polici bashkiak që gjendet me shumicë në qendër të Tiranës.
“Boldnews.al” u interesua dhe mësoi, megjithëse jo-zyrtarisht, se ekziston një lloj leje apo autorizimi i lëshuar nga kryetari i Bashkisë së Tiranës, Erion Veliaj, për qarkullimin në të gjithë cepat e qytetit, të mjeteve të rënda të përfshira në procesin e Rindërtimit.
Por, askush nuk jep përgjigje-njëlloj si dy policët bashkiakë të Rrugës së Elbasanit-a kontrollohen këto mjete të rënda nëse vërtetë po qarkullojnë për Rindërtimin apo kryejnë punët e tyre ndërtimore nën petkun e “lejes së Veliajt”.
“Pepa Group” është e përfshirë në disa projekte ndërtimi civile në Tiranë, si edhe është pjesë e fituesve të kontratave të Rindërtimit.
Kompania është krijuar në vitin 2014 nga Urim Pepa dhe, prej vitit 2021, është në pronësi të trashëgimtarëve ligjorë të themeluesit, Leorik, Urjola, Brian dhe Brixhilda Pepa.
Tenderat publikë
Të dhënat zyrtare tregojnë se kompania “Pepa Group” ka nisur të përfitojë nga tenderat publikë, duke filluar nga viti 2015.
“Boldnews.al” ka konsultuar të dhënat e përmbledhura nga portali i specializuar për transaksionet e Thesarit, “spendingdata.al”.
Për periudhën 2015-2018, kompania “Pepa Group” ka përfituar rreth 11.6 milionë lekë të reja në tenderat e institucioneve shtetërore.
Gjatë periudhës 2019-2023, ‘Pepa Group” shënon një rritje të madhe, krahasuar me tenderat e fituar më herët.
Gjatë këtij 4-vjeçarit të fundit, kompania e familjes Pepa ka arkëtuar 762.3 milionë lekë të reja nga fondet publike dhe tendera shtetërorë. Rreth një e treta e këtyre fondeve, ose rreth 224 milionë lekë të reja janë arkëtuar vetëm nga Bashkia e Tiranës dhe strukturat e varësisë së saj.
Rindërtimi
Të dhënat zyrtare tregojnë se “Pepa Group” është pjesë e bashkimeve operatore që kanë fituar tendera miliarda lekë nga procedurat e Rindërtimit, të zhvilluara nga Bashkia e Tiranës dhe Fondi Shqiptar i Zhvillimit, për të sistemuar pasojat e tërmetit tragjik të 26 nëntorit 2019.
“Pepa Group”, së bashku me dy operatorë të tjerë ekonomikë, është fitues i tenderit të zhvilluar nga Bashkia e Tiranës, me fond limit 445.641,802 lekë, me objekt: “Rindërtimi i njësive të banimit në ndërtesa (pallat) në zonën e shpallur për zhvillim të detyruar, në njësitë administrative 4 e 8, zona “5 Maji” Bashkia Tiranë. (Programi i Rindërtimit). “Hartim i projektit dhe zbatimi i punimeve për ndërtimin e godinës 12 (Seksioni A) në zonën zhvillimore “5 Maji”.
Po ashtu, emri i kompanisë “Pepa Group” është në krah të shoqërisë “Kevin Construction” të themeluar nga ish-kryebashkiaku i Kukësit, Safet Gjici, si edhe dy kompanive të tjera, të cilat u shpallën fituese në dy procedura të një pas njëshme, të zhvilluara nga Fondi Shqiptar i Zhvillimit, me fond limit 3.77 miliardë lekë të reja.
Objekti i këtij tenderi ishte ndërtimi i 277 banesave individuale, të prishura nga tërmeti.
