Policia e Vlorës ka parandaluar një ngjarje kriminale, pasi ka sekuestruar dy mia me telekomandë dhe si rezultat janë arrestuar dy persona.
Në kuadër të operacionit të koduar “Knock Out 2” janë vënë në pranga xhaxhai me nipin, shtetasit Fatjon Gjonaj, 33 vjeç, banues në Burrel dhe Ergys Gjonaj, 19 vjeç, banues në Laç.
“Shërbimet e Policisë, në hyrje të qytetit të Vlorës, ndaluan automjetin me të cilin lëviznin 2 të arrestuarit. Gjatë kontrollit të imtësishëm, në kroskotin e këtij automjeti, u gjetën dhe sekuestruan në cilësinë e provës materiale, 2 mina me telekomandë, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale.” thuhet në njoftimin e bluve të qytetit bregdetar.
Policia njofton se vijojnë veprimet e thelluara hetimore, në drejtimin e Prokurorisë së Vlorës, për të dokumentuar ligjërisht qëllimin e këtyre dy shtetasve, si dhe për kapjen e dy subjekteve të tjera të dyshuara të përfshira në këtë rast. Materialet procedurale i kaluan Prokurorisë së Vlorës, për veprime të mëtejshme.
Kujtojmë se në Vlorë, dy ditë më parë u parandalua një tjetër atentat. Policia vuri në pranga Amarildo Nikolli, 35-vjeç, i njohur me nofkën “shkodrani” i cili dyshohet se do të kryente një vrasje në afërsi të komplesit “Oslo”, zonë kjo ku vepron grupi i Edison Harizajt.
Në momentin e kapjes ai ishte me pantallona të shkurtra dhe një bluzë. Ndërkohë në çantë ju kapën një palë rroba të tjera, arma me silenciator një kapuç dhe doreza plastike. Këto sende kanë krijuar dyshimin dhe bindjen te policia se “Shkodrani”, kishte mbëritur në Vlorë për të bërë vrasje dhe nëse do kryente krimin në ikje e sipër të ndërohej.
