Ka zgjatur rreth 1 orë takimi në selinë e partisë Demokratike mes Ilir Metës dhe Sali Berishës.
Gjatë një reagimi për mediat në dalje të selisë blu, Meta theksoi se protestat do të jenë rruga e vetme që populli do shprehë zemërimin e tij ndaj qeverisë së korruptuar.
Meta u shpreh se do të përshkallëzojnë luftën kundër korrupsionit dhe do të vazhdohet “denoncimi pa ndërprerje i aferës e djegësve që ka shkuar mbi 700 mln euro dhe vendosjen e përgjegjësve para drejtësisë”, duke theksuar se garant kryesor është vetë kryeministri Rama.
Ilir Meta: “Jemi për mbështetjen e protestave, jo vetëm të inicuara nga partitë opozitare. Protestat janë një rrugë e domosdoshme. Do jetë përshkallëzimi i luftës kundër korrupsionit, vazhdimi pa ndërprerje për të denoncuar aferën e djegësve që ka shkuar mbi 700 mln euro dhe vendosjen e përgjegjësve para drejtësisë”.
Pyetje: A jeni thirrur në SPAK?
Ilir Meta: “Nuk do të ketë asnjëlloj shqetësimi në raportet e Metës me drejtësinë. Paratë e qytetarëve digjen lum nga korrupsioni, ka garant kryesor kreun e aferës së djegësve që është vetë kryeministri. Mos kini asnjë shqetësim, përveçse të mbrohen paratë e qytetarëve shqiptarë”.
I pyetur për garimin e Bashës për kreun e PD-së, Meta u përgjigj: “Ishte takimi frytshëm me liderin e PD-së dhe njëkohësisht uroj e besoj që gjithë demokratët, opozitarët të jenë atje ku duhen në vijën e parë të ballafaqimit me këtë regjim”.
