Policia e Shtetit ka konfirmuar se ka nisur kërkimet për kapjen e ish-zv.kryeministrit Arben Ahmetaj, që prej ditës së djeshme kur GJKKO miratoi kërkesën e SPAK për arrestimin e tij.
Mësohet se efektivët e Drejtorisë kundër Krimit Ekonomik kanë nisur kontrollet në disa banesa të Ahmetajt për ta gjetur atë fizikisht. Kërkime janë bërë edhe në banesat e familjarëve të Ahmetajt dhe mësohet se do të vazhdojnë të kontrollojnë deri sa të binden se ai nuk ndodhet në Shqipëri.
Ndërkohë sot bëhen plot dy javë që Ahmetaj ka dalë jashtë territorit të Republikës së Shqipërisë. mesditën e të premtes së 7 korrikut, pak para se SPAK të firmoste urdhër-arrestin për të, Ahmetaj iku në Greqi përmes pikës kufitare të Kakavijës. Ndërkohë tani, sipas avokatëve, Ahmetaj ndodhet në Britaninë e Madhe.
Por, pavarësisht këtyre informacioneve, strukturat e policisë mësohet se po kërkojnë brenda vendit për ekzekutimin e masës së vendosur në mungesë nga gjykata, sipas procedurës.
SPAK e akuzon Arben Ahmetajn për veprat penale të “Shpërdorimit të detyrës”, “Korrupsionit pasiv të funksionarëve të lartë shtetërore ose të zgjedhurve vendorë”, “Korrupsionit aktiv të funksionarëve të lartë shtetërore ose të zgjedhurve vendorë”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim” dhe “Pastrimi i produkteve të veprës penale ose veprimtarisë kriminale”.
Ahmetajn dyshohet se ka përfituar prona dhe qindra mijëra euro nga biznesmenët e inceneratorëve Klodian Zoto dhe Mirel Mërtiri. Këto janë bërë përmes disa transaksioneve që janë përpjekur të kamuflohen duke përfshirë disa biznesmenë të tjerë, vlerëson akuza. Po ashtu, hetimet tregojnë se Ahmetaj ka bujtur në hotele luksoze të paguara nga Klodian Zoto. Nisur nga këto prova, SPAK ka ngritur ndaj tij akuzën e korrupsionit pasiv. Gjithashtu, ish-ministri akuzohet se pasuritë e përfituara nuk i deklaruar sipas legjislacionit në fuqi.
Pak ditë më parë, me vendim të GJKKO, u ushtrua kontrolle në 7 banesa të familjarëve të Ahmetajt, ku sipas SPAK, gjatë kontrollit janë gjetur dhe sekuestruar dokumente me interes për hetimin si dhe kompjuter lap – top, telefona celularë, USB etj të cilët do ti nënshtrohen verifikimeve të mëtejshme.
Po ashtu, me vendim të GJKKO, Arben Ahmetajt atë ditë i janë sekuestruar 6 pasuri, nga të cilat 4 apartamente (njëri i përshtatur si AIR BNB) si dhe 2 llogari bankare në shumën 124 300 euro. Më herët, i është sekuestruar një vilë7 në hamallaj dhe një vilë në Palasë.
