Gjykata e Apelit të Venecias uli dënimin për Klinton dhe Ilmi Rakipaj, dy vëllezër me origjinë shqiptare, nga 18 në 15 vjet për vrasjen e bashkatdhetarit të tyre 24-vjeçar, Albert Deda, dhe plagosjen e dy personave të tjerë gjatë një konflikti më 23 korrik 2023 në Padova.
Ngjarja ndodhi në rrugën ‘Dorighello’, ku gjatë një debati, vëllezërit goditën Deda-n me thikë, duke e vrarë, dhe plagosën dy persona të tjerë, 26 dhe 28 vjeç, përpara se të largoheshin me një automjet ‘Renault Clio’ të kuqe. Ata u arrestuan ditën pasardhëse nga policia rrugore e Palmanovës.
Gjatë procesit të Apelit, gjyqtari Lorenzo Miazzi mori parasysh sjelljen e mirë të tyre në burgjet e Vicenzës dhe Rovigos dhe punën që kishin kryer atje, duke u dhënë lehtësime. Avokati i tyre kërkoi dhe arriti që pjesa e mbetur e dënimit të kryhet jashtë burgut.
Tani, Klinton dhe Ilmi Rakipaj do të qëndrojnë në shtëpinë e xhaxhait të tyre në zonën e Venecias, duke mbajtur shiritin elektronik dhe duke qëndruar nën masën e ‘arrestit shtëpiak’.
