Janë zbardhur detaje të reja nga krimi i dyfishtë i regjistruar pasditen e kësaj të enjte në fshatin Sumë, Njësia Administrative Pult, Dukagjin, ku u ekzekutuan me armë zjarri babë e bir, Gjokë dhe Eduart Gurra, 57 dhe 31 vjeç, në një pritë para banesës së tyre.
Mësohet se Gjokë Gurra ka punuar si efektiv i policisë së Shkodrës deri në vitin 2008 kur edhe është larguar nga policia. Më pas, ai ka punuar kryesisht me lëndë drusore për ngrohje dhe transportimin e tyre në Shkodër së bashku me të birin Eduartin, punë të cilën kanë që 15 vite që e bëjnë.
Burime për mediat bëjnë me dije se deri në këto momente, shkaku i krimit dyshohet të ketë qenë kultivimi i lëndëve narkotike. Mësohet se zona e njësisë administrative Pultit në Dukagjin konsiderohet si “zonë e kuqe” e kultivimit të drogës.
Gjithashtu, burime bëjnë me dije se një person është shpallur në kërkim si autor i dyshuar i krimit.
Dyshohet se personat që dogjën banesën e familjes Gurra natën e kaluar janë të njëjtët me ata që ekzekutuan babë e bir pasditen e sotme.
Djegia e banesës dyshohet se ka qenë plan i autorëve, për t’i nxjerrë në pritë viktimat, pasi Gjokë dhe Eduart Gurra, banonin në lagjen “Partizani” në Shkodër. Familja Gurra u njoftua për djegien e banesës dhe sot babë e bir shkuan të shikonin dëmet materiale, pasi në banesën në fshat nuk banonte njeri.
Mesa duket ngjarja ka qenë pritë. Aty, përpara shtëpisë së djegur, ata u ekzekutuan me armë zjarri nga persona të panjohur dhe mbetën të vdekur në vend.
Plani i autorëve siç duket ka qenë dhe për të zgjedhur një terren larg zonave të populluara, larg kamerave të sigurisë dhe larg uniformave blu. Kjo e vështirëson punën e Policisë për identifikimin e tyre.
Ndërkohë që as Gjokë Gurra dhe as djali i tij, Eduardi nuk kanë pasur rekorde kriminale dhe as gjakmarje.
“Rreth orës 16:40, në fshatin Sumë, Njësia Administrative Pult, në rrethana ende të paqarta janë vrarë me armë zjarri shtetasit Gj. G., 57 vjeç dhe djali i tij, E. G., 31 vjeç, banues në lagjen “Partizani”, Shkodër. Shërbimet e Policisë dhe Grupi hetimor janë nisur menjëherë për në vendngjarje. Me mbërritjen e shërbimeve dhe sqarimin e rrethanave të ngjarjes do të japim përsëri njoftim më të detajuar.” thuhet në njoftimin e Policisë.
