Nga Boldnews.al
Policia e Shtetit po përgatit një super tender për të blerë armë. Nëse më parë policia hapte tendera deri në 1 milionë euro për pistoleta dhe fishekë, kësaj herë shuma ka shkuar në plot 16 milionë euro. Kjo është shuma më e madhe e akorduar ndonjëherë për të blerë armë dhe municione për policët.
Redaksia e BoldNeës.al ka mësuar se drejtori i Policisë së Shtetit, Muhamet Rrumbullaku, ka këmbëngulur për të rinovuar armatimet e policëve. Por nuk specifikohet se çfarë armësh do të blihen. Ose më saktë, ndaj kujt do të përdoren këto armë?!
Shqipëria nuk është në gjendje lufte. Aq më tepër që këto armë s’do shkojnë për ushtrinë, por për policët. Ata të forcave speciale, grupet e ndërhyrjes së shpejtë, policët e rendit, rrugorëve etj. Pra, armët do të kërkohen që të blihen për të “trembur” qytetarët e thjeshtë. Ata që përballen çdo ditë me këta efektivë, shumica dërrmuese e tyre me një gjuhë fodulle që s’të japin zgjidhje.
Por, ajo çka lexohet mes rreshtave të këtij tenderi është dëshira e Edi Ramës, “shefit” të Rrumbullakut, për “dorë të hekurt”. Siç vepron prej shumë kohësh Erdogani në Turqi apo edhe Putini në Rusi. Këta të fundit janë prej shumë kohësh në pushtet dhe herë pas here ndërmarrin aksione policore për të shtypur opozitën. Por, a do të ecë në këto gjurmë edhe Edi Rama?
Natyrisht, me mbi 10 mijë policë dhe me armë që do të blihen për më shumë se 16 milione euro, Edi Rama mund të bëhet fare mirë Erdogani dhe Putini shqiptar. Sipas dolumenteve që disponon BoldNeës.al (dokumenti më sipër), është hapur tenderi me objekt “blerje armatim, municion dhe pajisje për përdorim policor”.
Autoriteti kontraktues është Agjencia Shtetërore e Prokurimeve të Përqëndruara, një institucion në varësi direkte të Kryeministrit Edi Rama.
Pra, tenderi nuk do të bëhet nga Policia e Shtetit, por nga vetë Kryeministri. Në dokument është shkruar se fondi limit i këtij tenderi është plot 1,635,506,605 lekë, ose e konvertuar në euro plot 16 milionë euro! Mësohet se procedura, shpallja, fituesi apo lidhja e kontratës do të bëhen në muajin gusht, larg vëmendjes dhe kureshtjes, në muaj pushimi.
