Të shtëna me armë zjarri janë shënuar pas mesditës së sotme në Vlorë, si pasojë e të cilave është plagosur një person.
I lënduari është Tonin Ramaj, 33 vjeç, i cili është transportuar për në spitalin rajonal me plagë në këmbë.
Dyshimet paraprake janë se kemi të bëjmë me një atentat ndaj të riut, që sipas burimeve policore, ka pasur edhe më herët probleme me ligjin.
Sipas të njëjtave burime, Ramaj është qëlluar teksa qëndronte i ulur në ambientet e jashtme një lokali në lagjen “Pavarësia 3”, mes një blloku pallatesh, ku edhe banonte. Si pasojë e të shtënave, Ramaj mbeti i plagosur në këmbë. I lënduari po merr mjekim në spitalin rajonal, ndërsa autori mbetet i panjohur për policinë.
Banorët të zonës janë shprehur se kanë dëgjuar 4 apo 5 të shtëna.
Një hetim ka nisur për zbardhjen e rrethanave të krimit. “Sot rreth orës 12:25, në lagjen ‘Pavarsia 3’, dyshohet se në rrethana ende të paqarta, është plagosur me armë zjarri shtetasi T. R (H), 33 vjeç, banues në Vlorë, i cili ndodhet nën kujdesin e mjekëve. Shërbimet e Policisë kanë shkuar menjëherë në vendngjarje, kanë rrethuar zonën dhe vijon krehja e saj për kapjen e autorit. Grupi hetimor vijon punën për zbardhjen e rrethanave të ngjarjes dhe fiksimin e çdo prove materiale që do çojë në identifikimin dhe kapjen e autorit”, thuhet në njoftimin parpak të policisë së Vlorë për ngjarjen.
