Kryetari i Partisë Demokratike Sali Berisha ka denoncuar edhe sot duke paraqitur fakte dhe video që rrëzojnë në mënyrë përfundimtare zgjedhjet e 14 majit.
Denoncimin me video dhe dokumente ku tregohet se si është manipuluar vota, KAS-i i ka quajtur normale, tha kryetari i PD-së Sali Berisha, duke theksuar se këto zgjedhjeve nuk mund të njihen.
Sipas Berishës, armiqtë më të këqinj të ligjit, janë juristët e korruptuar dhe se e njëjti manipulim i votës ka ndodhur në mbi 70-80% e qendrave në mbarë Shqipërinë.
Sali Berisha: “E them përsëri, që përsëritja e të njëjtës temë nuk është ndonjëherë atraksion për mediat, por kur është një gjë themelore, shmangia e saj përbën një gabim të pafalshëm. Pikërisht kjo më detyron mua të paraqes për të shumtën herë tek ju, fakte dokumente të cilët demaskojnë dhe rrëzojnë në mënyrë përfundimtare, zgjedhjet e 14 majit si procesi më i shëmtuar, më i pabarabartë, si procesi në të cilin u ushtruan të gjitha format e presionit mbi zgjedhësit shqiptarë, si procesi në të cilin ditën e zgjedhjeve në qendrën e votimit me kaosin e qëllimshëm të krijuar, me pushtimin e tyre nga një lukuni e tërë punonjës administrate që u sollën si polici elektorale, politike, proces zgjedhor nuk ka pasur. Ne po finalizojmë raportin në të cilin faktojmë të gjitha aspektet e rënda të dhunimit të këtyre zgjedhjeve. Ndaj dhe këtë bisedë me ju do ta filloj me këtë çështje”
VIDEO 1, publikuar nga PD: Operatorja e PEVN iu dikton votën qytetarëve dhe gjithashtu prek ekranin e pajisjes së votimit, duke votuar në këtë mënyrë edhe për qytetarët. Operatorja diktohet hapur kur shkon në fillim te zotëria e më pas te zonja duke prekur ekranin dhe duke votuar për të. Ajo vazhdon ta bëjë këtë proces vazhdimisht dhe në komunikim të hapur me votuesit.
VIDEO 2, publikuar nga PD: Operatori PEVN i dikton votën qytetarëve, ku njëkohësisht monitoron edhe ekranin e pajisjes së votimit. Këtë ai e bën me çdo qytetar që hyn për të votuar. Rast i përsëritur masivisht.
VIDEO 3, publikuar nga PD: (Zonja Koseni) punonjëse e administratës ndërpret votimin pa autorizim dhe i ushtron presion komisionerëve. Zonja Koseni largohet nga ambienti i votimit dhe thërret një tjetër punonjës të administratës i gjinisë mashkullore, Gentian Darzeza, i cili dhe ky i ushtron presion komisionerit.
VIDEO 4, publikuar nga PD: Në video operatori shihet duke votuar për qytetarët, por gjithashtu siç shihet në video ai voton edhe në vend të tyre. Duket qartë nga pamjet filmike sesi ai ndikon votën te qytetarët dhe voton për ta.
