Nga Skerdjan Dhuli
Lulzim Basha duhet të tërhiqet se pas tij nuk shkon as 10% e partisë ndërkohë me të kanë mbetur ose zyrtarë të PD të cilët nuk shkojnë dot te Berisha për shkak të përplasjeve mes palëve këto dy vjet (dhe Berisha është asgjesues në fjalor sulmi bashkë me taborin e tij) ose njerëz që Bashës i detyrohen personalisht për karrierën e tyre. Mendje politike të kthellët tjetër që shkon sot pas Lul Bashës nuk ka.
Lulzim Basha i ka ezauruar të gjitha etapat e tij në politikë dhe sot është njeriu me kredencialet më të ulëta në terren e ringritja e tij është praktikisht e pamundur. (Më lehtë bëhem unë sa Majkëll Xhordan sesa të bëhet Basha kryeministër).
Pa marrë parasysh që Basha gënjen dhe të vdekurit e për pasojë nuk e beson më askush nga demokratët…
Nga ana tjetër Berisha është përgjegjësi kryesor i katastrofës së 14 majit.
Të pretendosh që demokratët shiten dhe i bleka Edi Rama është fatalitet dhe demoralizuese për demokratët. Kjo tezë katastrofike e disfatiste ju nënkupton njerëzve “Rama ka më shumë lekë se ne, ndaj nuk e mundim dot…”.
Atëherë çfarë presim, të varfërohet Rama dhe ministrat e tij ? Të zvogëlohen grupet kriminale që punojnë për të ? Kjo nuk do ndodhë kurrë. Pra në momentin që kjo tezë artikulohet, automatikisht Berisha dhe klani rreth tij duhet të dorëzojnë armët.
Duhet pranuar që vota e 14 majit ishte votë kundër Berishës. Pse ? Nuk është normale që PD të ketë të njëjtin kryetar si në 1992 dhe në 2023 e të pretendojë që është alternativë qeverisëse në 2025.
Humbja e bashkive si Kamza, Tropoja, Shkodra, Dibra apo Laçi e Devolli, tregojnë se tanimë demokratët NUK e duan. Pikë.
Nga ana tjetër Berisha (dhe çdo njeri me mendje në kokë) e di që Rama i kontrollon gjykatat. Pra Berisha nuk do e marrë kurrë vulën dhe siglën e PD. Atëherë do bëjmë luftë me mullinjtë e erës ?
Duke parë rrethanat, Berisha duhet të bëjë vetë një sakrificë për demokratët duke u tërhequr dhe duke lejuar deputetët që i kontrollon të garojnë kundër Bashës.
Sot Lulzim Bashën e mund çdo deputet demokrat ndaj edhe PD ka vetëm një rrugë bashkimi, të ketë një kryetar të ri të pranuar nga demorkatët dhe nga ndërkombëtarët e njëkohësisht edhe të jetë alternativë e besueshme përballë Edi Ramës.
Për arsyet e mësipërme për Lulzim Bashën e Sali Berishën kam vetëm një thirrje, ikni se na morët më qafë. Na latë Edi Ramën peshqesh derisa të vdesë…
