Trafiku është fenomeni më shqetësues me të cilën qytetarët e Tiranë përballen çdo ditë në rrugët e kryeqytetit.
Si mos mjaftonte betonizimi dhe kantieret e ndërtimit në cep të kryeqytetit të cilat kanë “gllabëruar” çdo trotuar apo edhe hapësirë publike, tashmë është bërë e zakonshme që kamionët e plehrave të zbrazin kazanët në mes të ditës duke shkaktuar trafik të rënduar.
Një qytetar ka dërguar një mesazh denoncues në redaksinë e “Boldnews.al” ku bën me dije se kamioni ndalon mbi 10 minuta në mes të rrugës (i pa shqetësuar për trafikun që ka shkaktuar) për të marrë kazanët e plehrave, një punë e cila duhet të kryhet në mëngjes herët ose në orët e vona të mbrëmjes.
Fotografitë janë shkrepur në Unazës së Re në kryeqytet, një nga zonat më të populluara dhe njëkohësisht me trafikun më të rënduar. (Shikoni galerinë me foto)
Si për ironi të fatit kamionët e mbetjeve kanë dalë në një orar të papërshtatshëm, pikërisht në pikun e lëvizjes (16:00-17:00) ku pjesa më e madhe e qytetarëve kthehen nga puna. Në këtë fashë orari i gjithë kryeqyteti “paralizohet” nga trafiku i rënduar. Një dite të lodhshme, qytetarëve i shtohet edhe trafiku i rënduar vetëm sepse kryebashkiaku Erion Veliaj nuk tregon përgjegjshmëri ndaj tyre.
Në fakt situata e rënduar e trafikut është e njëjtë çdo ditë në Tiranë ku qytetarët përballen me situatën kaotike, rrugët e ngushtuara dhe betonizimin. Përgjegjës për situatën kaotike në kryeqytet është kryebashkiaku Erion Veliaj i cili e ka kthyer Tiranën në një kantier të madh ndërtimi, fluks makinash dhe ajër i ndotur.
