Nga BoldNews.al
“Fusha” dhe “Alko Impex”, dy nga firmat që kanë marrë me dhjetëra tendera nga veriu në jug, do të pastrojnë edhe vilat e politikanëve dhe resortet e oligarkëve në bregdet. Në fakt, pronarë e të dyja firmave janë vetë oligarkë, pasi kanë xhiruar me dhjetëra miliona euro gjatë 10 viteve të fundit, kur PS-ja është në pushtet. Kësaj here janë bashkuar dhe kanë “mundur” konkurentët e tjerë, pavarësisht se kanë ofruar me shumë. Ndihma ka qenë e madhe nga organi tenderues, siç është Agjencia Kombëtare e Bregdetit, e cila ka skualifikuar firmat që ofruan më pak duka ia dhuruar “në tavolinë” këto para’.
Duket se të gjitha dokumentet e tenderit janë bëra që të fitojnë këto të dyja si një e vetme, duke eleminuar edhe konkurencën. Sipas dokumenteve që disponon BoldNews.al, Ledio Lako, i cili është drejtor i Agjencisë Kombëtare të Bregdetit, ka firmosur këto ditë fituedit. Lako është një nga drejtorët më të atakuar, i cili ka bërë lëmsh mijëra individë dhe subjekte me dhënien e lejeve të plazhit, aq sa disa konflikte kanë shkaktuar edhe viktima, siç ishte edhe ngjarja e rëndë e disa viteve më parë në plazhin e Velipojës.
Sipas dokumentit të mësipërm, Agjencia e Bregdetit ka njoftuar dy firmat “Fusha” dhe “Alko Impex” se u shpallën fituese si një e vetme e tenderit me objekt “shërbimi i pastrimit të zonës bregdetare për bashkitë Durrës, Kavajë, Rrogozhinë”, tender i cili ka pasur një fond limit 91.483.578 lekë pa TVSH, me afat shërbimi 15 qershor – 15 shtator 2023. “Me anë të këtij njoftimi ju informojmë se, në këtë procedurë kanë marrë pjesë ‘REJ’ me vlerë 87.787.350 lekë pa TVSH dhe 105.344.820 lekë me TVSH. BOE ‘FUSHA’ dhe ‘ALKO-IMPEX’ me vlerë 88.588.414 lekë pa TVSH dhe 106.306.097 lekë me TVSH” thuhet në këto dokumente. Por, nga pjesëmarrësit janë skualifikuar “REJ”, pasi nuk ka deklaruar në fushat përkatësë gjëndjen e subjektit si dhe nuk është vendosur adresa përkatëse ku gjënden baza e të dhënave për subjektin. “Për administratorin Luan Kapri nuk ka deklaruar gjendjen gjyqësore të tij. Nuk ka deklaruar numrin e kërkuar të shoferëve për kryerjen e shërbimeve. Nga numri në total prej 27 punonjës shofer të kërkuar në DST, OE ka deklaruar vetëm 26 punonjës shofer. Gjithashtu nuk janë deklaruar ashtu siç kërkohet në DST punonjësit shoferë të specifikuar, konkretisht shoferë për makina teknologjike dhe shoferë për makinat e larjes së kontenierëve” thuhet në këto dokumente.
Ndërkohë, në të njëjtën kohë, Agjencia Kombëtare e Bregdetit ka shpallur fituesin e lotit II të tenderit të pastrimit të plazheve. Është i njëjti skenar, ku firmat “Alko Impex” dhe “Fusha” garuan si një e vetme. Sipas dokumentit të mësipërm, në procedurë mori pjesë “PASTRIME SILVIO” me vlerë 78.836.918 lekë me TVSH dhe BOE “ALKO IMPEX” dhe “FUSHA” me vlerë 83.364.653 lekë me TVSH. Ashtu si në tenderin e parë, firma që ofroi më pak, “PASTRIME SILVIO” u skualifikua se nuk përmbushte kushtet, pasi s’kishte deklaruar emrat përkatës të stafit inxhinierik të kërkuar si inxhinier mjedisi, inxhinier mekanik. Në fund, Lako ia ka “dhuruar” sërish edhe këtë tender oligarkëve “Fusha” dhe “Alko Impex”.
Por çfarë territoresh do pastrohen? Në të dy lotet parashikohet se do të pastrohet bregdeti i Durrësit, Kavajës, Rrogozhinës, Vlorës, Himarës dhe Sarandës. Në dokumentet shoqëruese janë edhe hartat me zonat që do pastrohen, kur përfshihen edhe fshatrat turistikë në Gjirin e Lalzit. Të gjithë e dinë se kush politikan jeton aktualisht në atë zonë. Se kush biznesmen, prokuror, gjyqtar apo drejtor. Apo se kush ka lokale dhe hotele. Në hartë parashikohet se përveç plazhit do pastrohet edhe zona e vilave private. Goxha biznes.
