Champions League do të vijojë sonte me dy sfida të tjera, njëra prej të cilave është derbi italian. Milan-Napoli mbetet sfida mes trajnerëve që kanë lënë gjurmë në dy kampionatet e fundit.
Pioli kundër Spallettit është një ndeshje brenda ndeshjes, më magjepsja për ata që ushqehen me futboll të pastër, ku atletika i lë hapësirë dinamikës, shpirtit të garës dhe tifozërisë së zjarrtë.
Fitorja 0-4 e Milanit në kampionat sonte nuk vlen aspak, edhe në kampin kuqezi e dinë mirë këtë. Pioli do të mbështetet te forma e mirë e Theo Hernandez dhe Leaos, ndërsa Spalletit i mungon lojtari më në formë, Osimhen.
Si do që të shkojë ndeshja e sotme, në Italia janë të bindur se kualifikimi do të vendoset në kthim, në stadiumin “Maradona”.
Sfida tjetër është ajo mes Real Madrid dhe Chelseas.
Madrilenët vijnë në këtë akt të parë të çerekfinales si kampionët në fuqi dhe duke larë duart me kampionatin, gjithë bateritë tashmë janë në Champions. Ancelotti me të tijtë duket se janë në habitatin e vet sonte dhe presin një fitore bindëse.
Në krahun tjetër, Blutë e Londrës mund të shpëtojnë sezonin vetëm nga ky kompeticion.
Lampard e di mirë vështirësinë, por nëse arrin të kalojë Realin, do të ishte një bonus i madh edhe për të si trajner dhe nuk është çudi të konfirmohej te Chelsea edhe për sezonin e ri.
