Një shpërthim i fuqishëm ka tronditur mëngjesin e sotëm lagjen Pianura, në periferi të Napolit, ku një fabrikë fishekzjarrësh është përfshirë nga flakët dhe ka shpërthyer, duke shkaktuar një viktimë dhe disa të plagosur.
Sipas agjencisë Ansa, një punonjës i fabrikës ka humbur jetën, ndërsa dy zjarrfikës kanë mbetur të plagosur. Megjithatë, raportimet janë ende të paqarta dhe të fragmentuara, me burime të tjera që flasin për tre zjarrfikës të përfshirë dhe dy karabinierë të plagosur lehtë.
Ngjarja ka ndodhur në një fabrikë të vendosur në Via Vicinale Grottole. Sipas dëshmitarëve, janë dëgjuar dy shpërthime të njëpasnjëshme, të ndjekura nga një re e madhe tymi gri që është ngritur mbi zonën. Shumë banorë kanë ndarë pamje dhe video amatore të momentit kur shtëpitë e tyre kanë dridhur nga fuqia e shpërthimit.
Dyshohet se fillimisht ka pasur një zjarr të vogël në ambientet e brendshme të fabrikës, ku zjarrfikësit kishin nisur ndërhyrjen, përpara se të ndodhnin shpërthimet fatale.
Autoritetet lokale janë ende në vendngjarje dhe hetimet për shkaqet e incidentit janë në zhvillim.
