Prej 24 orësh vëmendjen e opinionit publik e ka rrëmbyer përplasja në distancë mes kryeministrit Edi Rama dhe kryeopozitarit Sali Berisha, të cilët kanë njoftuar se do të kenë podcastet e tyre online.
“Mirëmëngjes dhe me disa fjalë për Podkastin tim, “FLASIM”, që së shpejti do të hapë siparin për të ftuarit, ju uroj një javë të mbarë”.
Kështu e lajmëroi Rama emisionit e tij online, madje duke ftuar kundërshtarët politikë që të flasin dhe të ballafaqojnë idetë në prag të zgjedhjeve lokale të 14 majit.
“Flasim është një eksperiencë re, për mua dhe ju. Flasim është podcasti im i menduar për të folur lirshëm në praninë tuaj me njerëz të njohur a të panjohur. Personazhe të skenës publike, politikës, artit, kulturës, medias, shqiptarë, të huaj, miqësorë apo jo ndaj meje. Por edhe protagonistë të jetës shqiptare aty ku nuk hyjnë sytë e vëmendjes publike, madje edhe kundërshtarë pse jo, nëse e pranojnë ndonjëherë ftesën. Kjo është dëshira! Flasim”, tha Rama në një video të shkurtër.
Ndërkohë Berisha iu përgjigj duke thënë se ka qenë i pari që ka pasur idenë e një podcast-i në YouTube. Berisha madje guxoi më tepër se Rama, duke i bërë ftesë publike kryeministrit për një debat mes tyre në podcastin e tij apo të shefit të qeverisë.
E teksa ende mbetet dilemë nëse do të kemi një përplasje live të dy liderëve të politikës shëiptare kur na ndajnë edhe 40 ditë nga zgjedhjet, fakt është se Berisha e nisi këtë të martë transmetimin, ku ka rrëfyer të pathëna nga fëmijëria e tij.
Podcasti i titulluar “Përtej Politikës”, ka nisur me një rrugëtim te fëmijëria e Berishës, jeta e tij në Viçidol të Tropojës, jetesa në kullë dhe dashuria e veçantë për xhaxhain e tij.
Duke iu referuar reagimit të djeshëm, podcasti në fjalë duket se është realizuar rreth muajit dhjetor, pasi në sfond është pema e Vitit të Ri, ndërsa Berisha mban zyre, pasi u dëmtua gjatë një proteste që mbajti opozita.
Ndërkohë, që mbetet të shihet me kuriozitet kundërpërgjigjia e Ramës, duket se në radhët e PS po e shohin me shqetësim angazhimin e dy liderëve politikë me podcaste.
Të paktën këtë ka lënë të kuptohet, konstatimi i Pandeli Majkos në mbledhjen e sotme të Komisionit për Çështjet Ligjore, ku ish-ministri i është drejtuar me një pyetje përfaqësueses së AMA-s që .
Majko kërkoi të dinte nëse këto podcast-e do të rregullohen me ligjin e ri të medias audio-vizive.
“Unë e kam pyetjen për përfaqësuesit e AMA-s. Pyetja mund të tingëllojë si ironi, por ndryshimet që vijnë sot kanë të bëjnë me ofruesit e shërbimeve të mediave audio-vizive Këto podcast që po dëgjojmë. Rama do të krijojë një podcast të vetin edhe zoti Berisha po ashtu. Këto janë të rregulluara nga ky ligj? Janë nën rregulloren e këtij legjislacioni q po diskutojmë sot? Kam përshtypjen e influenca e rrjeteve sociale po krijon disa zona të lira të ashtuquajtura ekonomike dhe këtu po diskutojmë për të kontrolluar disa mediave të licensuara në një kohë që tregu i medias është ridimensionuar. A ka fuqi AMA të ndërhyjë, apo duhen rregulla ligjore? Pyetja ime është a është e rregulluar kjo?”, pyeti Majko.
Ndërkoha nga AMA, përfaqësuesja u përgjigj duke thënë se “bëhet fjalë për platforma e jo për individë”.
“Janë platforma të shpërndarjes së videove”, shtoi ajo.
