Ditën e sotme në Gjykatën Speciale të Hagës zhvillohet procesi gjyqësor ndaj ish-krerëvetë Ushtrisë Çlirimtare të Kosovës të cilët akuzohen për krime lufte.
Momente prekëse teksa katër ish-liderët e Ushtrisë Çlirimtare të Kosovës janë deklaruar të pafajshëm për akuzën e krimeve të luftës në seancën e sotme në Dhomat e Specializuara në Hagë. Ata janë njohur me akuzën dhe të pyetur nëse i qëndrojnë deklaratave të mëparshme, kanë konfirmuar.
“E kuptoj aktakuzën, jam plotësisht i pafajshëm”, kështu ka deklaruar ish-presidenti dhe ish-kryeministri i Kosovës Hashim Thaçi para gjykatësit.
Pas leximit të akt akuzës nga prokuroria janë pyetur dhe ish-liderët e tjerë të UÇK-së Kadri Veseli, Rexhep Selimi dhe Jakup Krasniqi.
“E shpreh pakënaqësinë time për një vonesë 2 vite e gjysmë, por ju falënderoj. Deklarohem tërësisht i pafajshëm”, tha Veseli.
“Jam i pafajshëm në të gjitha pikat e aktakuzës”, deklaroi Selimi.
“E kam të vështirë të kuptoj akuzën dhe mënyrën si është përpiluar kjo akuzë. Nuk kam asnjë lidhje me asnjërën nga pikat që i lexoi prokurorja para pak minutash. Akuzën e kuptoj siç është, por nuk pajtohem me të, pasi nuk mbaj asnjë përgjegjësi për çfarë flet akuza. Plotësisht i pafajshëm”, deklaroi Krasniqi.
Ish-presidenti i Kosovës, Hashim Thaçi, dhe tre bashkëpunëtorë të tij të kohës së luftës, Kadri Veseli, Jakup Krasniqi dhe Rexhep Selimi akuzohen për krime lufte dhe krime kundër njerëzimit.
Prej nëntorit të vitit 2020, ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, gjenden në paraburgim në Hagë të Holandës.
Prokurori i specializuar, Alex Whiting tha në hyrje të seancës ndaj tyre se rasti ndaj ish-katër krerëve të UÇK-së ka të bëjë me ta personalisht e jo me gjithë UÇK-në.
“Kjo çështje gjyqësore nuk kërkon të procedojë UÇK-në dhe nuk akuzon të gjithë anëtarët e saj. Akuzat ngrihen kundër katër vetave. Shumica e anëtarëve të UÇK-së nuk kishin të bënin fare me krimet për të cilat është ngritur aktakuza”, tha Alex Whiting
Ai tha se një prej çështjeve më të ndjeshme të këtij rasti ka të bëjë me frikësimin e dëshmitarëve. Sipas tij, disa prej dëshmitarëve që do të paraqiten në seancë gjatë procesit gjyqësor do të kenë “frikë” të tregojnë për ato që kanë përjetuar.
Gjatë fjalëve hyrëse të Prokurorisë Speciale, ushtruesi i detyrës së prokurorit të specializuar, Alex Whiting, pretendoi se Hashim Thaçi ka bërë disa deklarata të rreme gjatë fazës së hetimit para ngritjes së aktakuzës.
I pandehuri “Hashim Thaçi ka ardhur disa herë në fshehtësi për të dhënë intervista në SPO”, ka thënë Whiting në gjykatë, duke shtuar se: “Ai (Thaçi) ka mohuar shumë për rolin e tij dhe rolin e shtabit të përgjithshëm”.
Whitingu pohoi se Thaçi i kishte thënë PSP-së në një nga intervistat gjatë fazës së hetimit se shtabi i përgjithshëm i UÇK-së nuk funksionoi deri në nëntor 1998 dhe madje edhe më pas “ekzistonte vetëm në letër”.
Megjithatë, sipas prokurorit Whiting, SPO-ja do të dëshmojë se deklaratat e Thaçit ishin “kundërshtuar nga deklaratat e tij dhe deklaratat e të akuzuarve”.
“Përse zotëri Thaçi erdhi këtu në Hagë dhe i bëri këto pretendime të rreme sa i përket rolit të tij gjatë luftës lidhur me UÇK-në. Nga se po donte të largohej, çfarë po përpiqej të fshihte. Në fund fare, gjykimi që po fillon sot do t’u japë përgjigje këtyre pyetjeve”, tha Whitingu.
Sakaq, jashtë ambienteve të gjykatës mijëra shqiptarë e kosovarë të diasporës janë organizuar në një marshim-protestë, nën moton “Liria ka emër”, duke kërkuar gjykim të drejtë dhe lirinë e ish-krerëve të luftës.
Me brohoritjet “UÇK” që ushtojnë në Hagë, shqiptarët e diasporës të ardhur kryesisht nga Gjermania, Austria, Zvicra dhe Belgjika kërkojnë gjykim të drejtë për Thaçin, Veselin, Krasniqin dhe Selimin.
