Partia Demokratike, dega Kavajë, ka denoncuar drejtoreshën e gjimnazit “Aleksandër Moisiu”, se është kthyer në një vegël qorre të Partisë Socialiste duke detyruar nxënësit për të marrë pjesë me detyrim në takimet e kryebashkiakut!
Në denoncimin e saj, PD dega Kavajë, deklaron se Begzana Kazazi, drejtoresha e Gjimnazit të Kavajës është kthyer në patronazhiste të PS!
“Gjimnazi i Kavajës po kthehet në çerdhe të Partisë Socialiste. Drejtuesit e tyre ushtrojnë presion të vazhdueshëm ndaj nxënësve që të marrin pjesë në takimet politike të kryebashkiakut në ikje, në këmbim të notave të mira apo ndihmës në provimet e maturës. Begzana Kazazi, drejtoresha e gjimnazit Aleksandër Moisiu ka thirrur me urdhër ditën e nesërme nxënësit ekselentë në takim me deputetin e PS dhe kryebashkiakun e Kavajës. Ky skandal, denoncohet nga vetë nxënësit e gjimnazit të cilët janë detyruar nga zonja në fjalë! I bëjmë thirrje personalisht drejtoreshës Begzana Kazazi, por edhe shumë Begzanave që profesionalizmin e detyrën e tyre e kanë lënë mënjanë, për tu kthyer në vegla qorre të partisë në pushtet, të ndalin menjëherë presionet ndaj nxënësve, ose do të përballen me kallëzim penal në organet kompetente dhe denoncim publik në mediat e vendit. Godinat arsimore, janë për të shkolluar e për t’u dhënë dije brezave të së ardhmes, jo për tu kthyer nga mësues në patronazhist shërbëtor të partisë!”, thuhet në denoncimin e PD-së.
