Nëna lehonë Diana Bahçja, e cila u arrestua 1 javë pas lindjes për një gjobë të marrë në vitin 2020, ka treguar se qëndrimi në burg ka qenë shumë i vështirë. Ndërkaq ajo konfirmoi se nuk ka qenë në dijeni të gjobës që ka marrë.
“Ishte e vështirë. Nuk e përballoja dot. Me zor kam qëndruar në burg, duke qarë. Kam pasur dhimbje trupit.
Djalin e gjeta mirë. Ishin kujdesur burri dhe vjehrra.
Kur shkova në polici më thanë je e dënuar. Më thanë nuk duam të dimë që ke lindur, nuk kemi lidhje me atë punë. Do vijë policia e Tiranës për të marrë.
Nuk kam qenë në dijeni për gjobën, për asgjë. Në burg kam qëndruar vetëm. Kanë qenë ditë të vështira.”- tha Diana.
Nëna lehone rrëfen edhe pse u kishte thënë që sapo kishte lindur askush nuk ka marrë parasysh këtë fakt, duke treguar moskokëçarje
“Infermieret u kujdesën për mua ty. Kur shkova te policia e Shkodrës thjesht më thanë që je dënuar 1 muaj e 10 ditë. Ata të Tiranës më thanë 1 muaj e 20 ditë. Erdhën të Tiranës më morën dhe më çuan. U tregova se sapo kisha lindur. Nuk donin t’ia dinin. Nuk kemi lidhje me atë punë. Kam ndenjur në Shkodër 3 orë, 4. Policia e Tiranës nuk kanë fol fare. Nuk më kanë dhënë përgjigje. Thjesht heshtën”, tha ajo.
Ajo shprehet se nuk ka qenë në dijeni as për gjobën dhe as për dënimin: “Thjesht ka ardhur ai zotëria këtu tek shtëpia dhe më ka marrë”.
