Deputeti i Partisë Demokratike Edmond Spaho deklaron se grupimi i Alibeajt do të regjistrohet në zgjedhjet e 14 Majit, pasi sipas tij, kryeministri Rama ka investuar shumë për ta.
“Celibashi tha një gjë të madhe, kryetari është Sali Berisha dhe formalisht do t’ja japim Alibeajt, këtu ka komedi, cinizëm, tragjedi, por në fund do t’i kushtojë vendit. Jam i mendimit që ata do të regjistrohen sepse ç’kuptim do të kishte gjithë ky investim i Ramës për t’i dhënë çelësat Bashës.
Ramës i duhet Basha dhe Alibeaj prandaj ka investuar tek ta. Celibashi në fund të fundit, ka një jetë të tërë në këtë fushë dhe me siguri ka mësuar nga problematika e viteve të para, kur bënin protesta ndaj Celibashit bashkë me Nanon. Besoj që kjo i ka vlejtur të paktën profesionalisht, nga ana formale i takon këtij, por kapi një problem dhe ia pasoi topin KAS-it, edhe KAS përdori një artificë tjetër, nëse KAS mban të njëjtin qëndrim si Celibashi, do ta çojnë te Gjykata e Apelit”, tha Spaho në Milori Live në Klan News.
Më tej ai tha se Partia Demokratike duhet të jetë në zgjedhje pavarësisht logos dhe shtoi se çështja nuk është partiake apo gjyqësore, por shpëtimi i pluralizmit.
“PD duhet të jetë në zgjedhje, pavarësisht nëse është logo apo jo. Është një çështje shumë e madhe jo për PD, por për shoqërinë shqiptare. Sepse po bëhen përpjekje për të nxjerrë nga skena politike forcën më të madhe opozitare.
Rruga më e lehtë do të jetë me koalicion, sepse i di vështirësitë e një procesi gjyqësor që është kokë e këmbë i varur. Shoqëria jonë duhet të kuptojë që ky nuk është një problem partie. E marrin si çështje partiake apo gjyësore ndërkohë që është fjala do kemi apo jo pluralizëm.
Nuk them që i fitojmë të 61 bashkitë, por do të përpiqemi të marrim sa më shumë. Ne pak a shumë ishim në të njëjtën gjendje në 2021-in, po të mos ishin bërë ato pazaret, opozita do të ishte fituese sot, kështuqë ne po përpiqemi të fitojmë në zgjedhjet e 14 Majit dhe të krijojmë një bazë të qëndrueshme për zgjedhjet e vitit 2025. Më e mira do të ishte që ne të ishim me simbolet tona, sepse kemi një kryetar, organet drejtuese dhe duam të konkurrojmë me ndershmëri”, përfundoi deputeti.
