Partizani dhe Tirana u ndeshen me njëra-tjetrën në “Air Albania”, për të mbyllur javën e 24-të të Superiores. Partizani ka triumfuar 2-0 në derbi përballë Tiranës në një sfidë ku ndodhi gjithçka, në fushë dhe në tribuna.
Po ashtu si gjithmonë pati dhe përplasje mes tifozërive, të cilat agravuan aq shumë saqë përfunduan dhe në fushë.
Policia bën me dije se ka nisur procedimi në gjendje të lirë për shtetasit A. Xh., 21 vjeç, A. G., 27 vjeç dhe një shtetas 15 vjeç, pasi gjatë ndeshjes kanë kryer veprime të dhunshme, duke hedhur lëndë piroteknike, ndërsa shtetasi A. G. ka hyrë në fushën ku zhvillohej ndeshja.
“Specialistët për Hetimin e Krimeve të Komisariatit të Policisë Nr. 1 referuan materialet në Prokurori dhe nisi procedimi në gjendje të lirë për shtetasit A. Xh., 21 vjeç, A. G., 27 vjeç dhe një shtetas 15 vjeç, pasi ditën e djeshme, gjatë ndeshjes së futbollit mes ekipeve Partizani – Tirana, kanë kryer veprime të dhunshme, duke hedhur lëndë piroteknike, ndërsa shtetasi A. G. ka hyrë në fushën ku zhvillohej ndeshja.
Policia vijon veprimet hetimore për identifikimin dhe procedimin penal dhe administrativ, të shtetasve të tjerë kanë kryer veprime të dhunshme dhe kanë lëndë piroteknike, gjatë dhe pas ndeshjes.”, njofton policia.
Të parët që goditën ishin tifozat “bardheblut”, të cilë hodhën kapsolla drejt portierit të Partizanit, Bekim Rexhepi, me mjekët e “demave të kuq” që u hodhën menjëherë në fushë në ndihmë të tij.
Përgjigjja e tifozerisë së Partizanit ishte e menjëhershmë duke qëlluar dhe portierin Visar Bekaj me mjete piroteknike.
